മുക്കം: 67 വര്‍ഷം പിന്നിടുന്ന പന്നിക്കോട് എ.യു.പി സ്‌കൂളിലെ പൂര്‍വവിദ്യാര്‍ഥികളുടെയും അധ്യാപകരുടെയും ഒത്തുചേരല്‍ 26ന് നടക്കും.
പരിപാടിയുടെ ഭാഗമായി ലിംക ബുക്ക് ഓഫ് റെക്കോഡ് ലക്ഷ്യമിട്ട് സ്വാഗതസംഘത്തിന്റെ നേതൃത്വത്തില്‍ പൂര്‍വവിദ്യാര്‍ഥി നിര്‍മിക്കുന്ന ലോകത്തിലെ തന്നെ ഏറ്റവും വലിയ പേനയുടെ നിര്‍മാണം അന്തിമഘട്ടത്തിലാണ്. സ്‌കൂളില്‍ നിന്ന് പഠനം പൂര്‍ത്തിയാക്കിയ ഏഴായിരത്തിലധികം വിദ്യാര്‍ഥികളും അധ്യാപകരുമാണ് ഒത്തുകൂടുന്നത്.
പരിപാടി ജോര്‍ജ് എം. തോമസ് എം.എല്‍.എ ഉദ്ഘാടനം ചെയ്യും. ഗ്രാമപഞ്ചായത്ത് പ്രസിഡന്റ് സി.ടി.സി അബ്ദുല്ല അധ്യക്ഷനാകും. പ്രൊഫ. ഹമീദ് ചേന്ദമംഗല്ലൂര്‍ മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് പ്രസിഡന്റ് രമ്യാ ഹരിദാസ്, ജില്ലാ പഞ്ചായത്തംഗം സി.കെ കാസിം തുടങ്ങിയവര്‍ പങ്കെടുക്കും.
12 ക്ലാസ് മുറികളുള്ള പുതിയ കെട്ടിടം സ്‌കൂളിനായി ഒരുങ്ങുമ്പോള്‍ മള്‍ട്ടി പര്‍പ്പസ് സ്റ്റേജും ലൈബ്രറിയും പൂര്‍വവിദ്യാര്‍ഥികള്‍ സ്‌കൂളിനായി നിര്‍മിച്ചു നല്‍കുന്നുണ്ട്. പൂര്‍വവിദ്യാര്‍ഥികളുടെ അസംബ്ലി, ഗാനമേള, മജീഷ്യന്‍ കെ.ടി.എസ് നേതൃത്വം നല്‍കുന്ന മാജിക് ഷോ, ബാച്ച്തല സംഗമം, പൂര്‍വാധ്യാപകരെ ആദരിക്കല്‍, പദ്ധതി സമര്‍പ്പണം തുടങ്ങിയവ പരിപാടിയുടെ ഭാഗമായി നടക്കും.
വാര്‍ത്താ സമ്മേളനത്തില്‍ സ്വാഗതസംഘം ചെയര്‍മാന്‍ ടി.കെ ജഅ്ഫര്‍, കണ്‍വീനര്‍ സി. ഹരീഷ്, രമേശ് പണിക്കര്‍, മജീദ് കുവപ്പാറ, സ്‌കൂള്‍ മാനേജര്‍ സി. കേശവന്‍ നമ്പൂതിരി പങ്കെടുത്തു.