മേപ്പാടി: ബൈക്ക് മോഷണം പതിവായതോടെ പൊലിസ് നടത്തിയ അന്വേഷണം ചെന്നെത്തിയത് 13, 14 വയസുള്ള കുട്ടികളില്‍. കഴിഞ്ഞ രണ്ട് മാസത്തിനിടെ നാല് ബൈക്കുകളാണ് കാണാതായത്. തുടര്‍ന്ന് നടത്തിയ അന്വേഷണത്തില്‍ ഒരു ബൈക്ക് നെല്ലിമുണ്ട-ഒന്നാം മൈലില്‍ നിന്നും കണ്ടെടുത്തു. മുക്കില്‍ പീടികയില്‍ ശിഹാബ് തന്റെ വീട്ടുമുറ്റത്ത് നിര്‍ത്തിയിട്ട ബൈക്കാണിത്. തുടര്‍ന്ന് നടത്തിയ അന്വേഷണത്തിലാണ് കുട്ടികളാണ് ബൈക്ക് മോഷണത്തിന് പിന്നിലെന്ന് കണ്ടെത്തിയത്. മാസങ്ങള്‍ക്ക് മുന്‍പും സമാനമായ രീതിയില്‍ രണ്ട് കുട്ടികളെ ബൈക്ക് തള്ളികൊണ്ടു പോകുന്നതിനിടെ നാട്ടുകാര്‍ പിടികൂടിയിരുന്നു. കുട്ടികളെ ഉപയോഗിച്ച് മോഷണം നടത്തിക്കുന്ന സംഘം പ്രവര്‍ത്തിക്കുന്നതായും പൊലിസിന് സൂചന കിട്ടിയിട്ടുണ്ട്.