കൊച്ചി: മുന്‍ ഇന്ത്യന്‍ ഫുട്‌ബോള്‍ താരം എന്‍.പി പ്രദീപിനെ കേരള ബ്ലാസ്റ്റേഴ്‌സിന്റെ ഔദ്യോഗിക പ്ലെയര്‍ സ്‌കൗട്ട് ആയി നിയമിച്ചു. യുവ താരങ്ങളേയും കേരളത്തില്‍ നിന്നുള്ള ഭാവി താരങ്ങളെയും കണ്ടെത്തുന്നതിനായി ഹെഡ് കോച്ച് സ്റ്റീവ് കോപ്പലും അസിസ്റ്റന്റ് കോച്ച് ഇഷ്ഫാക് അഹമ്മദുമായി ചേര്‍ന്ന് പ്രദീപ് പ്രവര്‍ത്തിക്കും. 

തൊടുപുഴയില്‍ നിന്നുള്ള പ്രദീപ് പതിനേഴു വയസ് മുതല്‍ സ്റ്റേറ്റ് ബാങ്ക് ഓഫ് ട്രാവന്‍കൂറിനു വേണ്ടി കളിച്ചിരുന്നു. ഗോള്‍കീപ്പര്‍ ഒഴികെ എല്ലാ പൊസിഷനിലും കളിച്ചിട്ടുള്ള പ്രദീപ് കേരള ലീഗ് മത്സരങ്ങളില്‍ വിജയിക്കാന്‍ എസ്.ബി.ടിക്ക് കരുത്തായിരുന്നു. ഡിഫന്‍സീവ് താരമായും സ്‌ട്രൈക്കറായും മിഡ് ഫീല്‍ഡറായും പ്രദീപ് തിളങ്ങി.
വിവിധ പ്രായത്തില്‍ ഇന്ത്യയെ പ്രതിനിധീകരിച്ച പ്രദീപ് അണ്ടര്‍ 20 ടീമിനൊപ്പം 2002ല്‍ എ.എഫ്.സി യൂത്ത് ചാംപ്യന്‍ഷിപ്പില്‍ ക്വാര്‍ട്ടര്‍ ഫൈനലിലെത്തിയിരുന്നു. 2005ല്‍ സാഫ് ഗെയിംസ് ചാംപ്യന്‍ഷിപ്പ് നേടിയ ഇന്ത്യന്‍ ടീമില്‍ അംഗമായിരുന്നു. 50 അന്താരാഷ്ട്ര മത്സരങ്ങളില്‍ പങ്കെടുത്തിട്ടുള്ള പ്രദീപിന്റെ ബോക്‌സിനു പുറത്തു നിന്നുളള ശക്തമായ ഷോട്ടാണ് 2007ല്‍ ആദ്യമായി നെഹ്‌റു കപ്പ് നേടാന്‍ ഇന്ത്യയെ സഹായിച്ചത്.