കൊണ്ടോട്ടി: കാലിക്കറ്റ് സര്‍വകലാശാലയിലെ വിദ്യാര്‍ഥിനികളോട് അപമര്യാദയായി പെരുമാറിയ സംഭവത്തില്‍ സി.പി.എം ബ്രാഞ്ച് സെക്രട്ടറിയുള്‍പ്പെടെ മൂന്ന് പേര്‍ അറസ്റ്റില്‍. നെടിയിരുപ്പ് എന്‍.എച്ച് കോളനി ബ്രാഞ്ച് സെക്രട്ടറി ഷാജി(42), എന്‍.എച്ച് കോളനി സ്വദേശികളായ രവി(45), ഷൈജു(34) എന്നിവരെയാണ് കൊണ്ടോട്ടി പൊലിസ് അറസ്റ്റ് ചെയ്തത്. വ്യാഴാഴ്ച ഉച്ചക്ക് ശേഷമാണ് കേസിനാസ്പദമായ സംഭവം. സര്‍വകലാശാലയിലെ ഇംഗ്ലീഷ് പി.ജി വിദ്യാര്‍ഥിനികളായ മൂന്ന് പേര്‍ നെടിയിരുപ്പ് എന്‍.എച്ച് കോളനിക്ക് സമീപത്തെ മിനി ഊട്ടിയില്‍ ഡോക്യുമെന്ററി ഷൂട്ടിങ്ങിനായി എത്തിയതായിരുന്നു. ഇവരോട് സംഭവസ്ഥലത്തേക്ക് ഇരുചക്ര വാഹനത്തില്‍ എത്തിയ രവിയും ഷൈജുവും മോശമായി പെരുമാറിയെന്നാണ് പരാതി. വിദ്യാര്‍ഥിനികളുടെ കൈയില്‍ കയറിപിടിക്കുകയും മൊബൈലില്‍ ഫോട്ടോ എടുത്തതായും പരാതിയില്‍ പറയുന്നു. അസഭ്യം പററയുകയും തടഞ്ഞു നിര്‍ത്തുകയും ചെയ്തു. പ്രശ്‌നത്തിനിടെ ഒത്തുതീര്‍പ്പാക്കുന്നതിനായി എത്തിയതായിരുന്നു ഷാജി. എന്നാല്‍ ഇയാളും പിന്നീട് ഇവര്‍ക്കൊപ്പം ചേരുകയായിരുന്നുവെന്നാണ് വിദ്യാര്‍ഥിനികളുടെ പരാതി.