ജിദ്ദ: മക്കയിലെ മസ്ജിദുല്‍ ഹറമിലെത്തുന്നവര്‍ക്ക് ചൂടില്‍ നിന്നും ആശ്വാസമേകാന്‍ വിപുലമായ സൗകര്യങ്ങളാണ് ഒരുക്കിയിരിക്കുന്നത്. എയര്‍ കണ്ടീഷനുകള്‍ക്കു പുറമെ പള്ളിക്കു ചുറ്റുമുള്ള വാട്ടര്‍ സ്‌പ്രേ ഫാനുകളും മറ്റു സാധാരണ ഫാനുകളും കഠിന ചൂടില്‍ നിന്നും തീര്‍ഥാടകര്‍ക്ക് വലിയൊരു ആശ്വാസമാണ് നല്‍കുന്നത്.

കഠിന ചൂടില്‍ നിന്നും തീര്‍ഥാടകര്‍ക്കും മറ്റും ആശ്വാസമേകാന്‍ മക്കയിലെ മസ്ജിദുല്‍ ഹറം മുറ്റങ്ങളില്‍ 600 വാട്ടര്‍സ്‌പ്രേ ഫാനുകളാണ് ഇരുഹറം കാര്യാലയം ഒരുക്കിയിരിക്കുന്നത്. ഏതാനും വര്‍ഷങ്ങള്‍ക്ക് മുമ്പാണ് ഇത്തരം ശക്തിയേറിയ വാട്ടര്‍സ്‌പ്രേ ഫാനുകള്‍ സ്ഥാപിച്ചത്. ചൂട് 30 ഡിഗ്രി ഷെല്‍ഷ്യസ് വരെ ആകുമ്പോഴാണ് ഫാനുകള്‍ പ്രവര്‍ത്തിച്ചു തുടങ്ങുക. ഫാനുകളുടെ പ്രവര്‍ത്തനം വഴി ഹറം മുറ്റങ്ങളിലെ ചൂടിന്റെ അളവ് ഒമ്പത് ഡിഗ്രി ഷെല്‍ഷ്യസ് വരെ കുറക്കാന്‍ സാധിക്കുമെന്നാണ് പറയപ്പെടുന്നത്. ഫ്രിയോണ്‍ സംവിധാനത്തിലൂടെ അന്തരീക്ഷം തണുപ്പിക്കുന്നതിനേക്കാള്‍ മികച്ചതും കാലാവസ്ഥക്ക് അനുയോജ്യവും വൈദ്യുതി ഉപയോഗം കുറക്കുന്നതുമാണ് വാട്ടര്‍ സ്‌പ്രേ ഫാനുകള്‍. ഫാനുകള്‍ക്ക് വേണ്ട വെള്ളമെത്തിക്കുന്നതിന് പ്രത്യേക സംഭരണി ഒരുക്കിയിട്ടുണ്ട്. ഫില്‍റ്റര്‍ ചെയ്തു ശുദ്ധീകരിച്ച വെള്ളം പ്രത്യേക പൈപ് ലൈന്‍ സംവിധാനം വഴിയാണ് ഫാനിലേക്ക് പമ്പ് ചെയ്യുന്നത്. 40 മുതല്‍ 45 ഡിഗ്രി ഷെല്‍ഷ്യസ് വരെ ചൂടാണ് ഇപ്പോള്‍ മക്കയില്‍ അനുഭവപ്പെടുന്നത്. ലോകത്തിന്റെ വിവിധ ഭാഗങ്ങളില്‍ നിന്നെത്തിയ ഉംറ തീര്‍ത്ഥാടകരേകൊണ്ട് നിറഞ്ഞിരിക്കുകയാണ് മസ്ജിദുല്‍ ഹറമും പരിസരവും. ഇവര്‍ക്ക് കഠിന ചൂടില്‍ നിന്നും വലിയൊരു ആശ്വാസം തന്നെയാണ് വാട്ടര്‍ സ്‌പ്രേ ഫാനുകള്‍.