മലപ്പുറം: ഹയര്‍ സെക്കന്‍ഡറി മേഖലയെ അസ്ഥിരപ്പെടുത്താനുള്ള നീക്കത്തിനെതിരേ ഹയര്‍ സെക്കന്‍ഡറി സംയുക്ത അധ്യാപക സമിതി(എഫ്.എച്ച്.എസ്.ടി.എ)യുടെ നേതൃത്വത്തില്‍ നടന്ന ക്ലസ്റ്റര്‍ ബഹിഷ്‌കരണം പൂര്‍ണ വിജയം. ഹയര്‍ സെക്കന്‍ഡറി വകുപ്പിനെ പൊതുവിദ്യാഭ്യാസ വകുപ്പില്‍ ലയിപ്പിക്കാനുള്ള നീക്കത്തിന്റെ ഭാഗമായി നടന്ന സംയുക്ത ക്ലസ്റ്ററാണ് അധ്യാപകര്‍ ബഹിഷ്‌കരിച്ചത്. ബഹിഷ്‌കരണ സമരത്തിന്റെ പേരില്‍ ഏതെങ്കിലും തരത്തിലുള്ള അച്ചടക്കനടപടിയുണ്ടായാല്‍ വരാനിരിക്കുന്ന പ്ലസ്ടു മൂല്യനിര്‍ണയ ബഹിഷ്‌കരണമടക്കമുള്ള കടുത്ത സമരത്തിലേക്ക് അധ്യാപകര്‍ സംയുക്ത അധ്യാപക സമിതിയുടെ നേതൃത്വത്തില്‍ നീങ്ങുമെന്ന് എഫ്.എച്ച്.എസ്.ടി.എ ഭാരവാഹികള്‍ അറിയിച്ചു. ക്ലസ്റ്റര്‍ ബഹിഷ്‌കരിച്ച ഹയര്‍ സെക്കന്‍ഡറി അധ്യാപകര്‍ മലപ്പുറത്ത് പ്രതിഷേധപ്രകടനവും ധര്‍ണയും നടത്തി. ധര്‍ണ ടി.വി ഇബ്രാഹീം എം.എല്‍.എ ഉദ്ഘാടനം ചെയ്തു. ഡി.സി.സി പ്രസിഡന്റ് അഡ്വ: വി.വി പ്രകാശ് മുഖ്യപ്രഭാഷണം നടത്തി. ഫെഡറേഷന്‍ നേതാക്കളായ ഒ.ഷൗക്കത്തലി, ജോസ് ജോണ്‍, ടി. വിജയന്‍, വി. സിജു, പി. ഇഫ്ത്തിക്കാറുദ്ദീന്‍, മുഹമ്മദ് ഇസ്മായില്‍, ടി.എസ് ഡാനിഷ്, മനോജ് ജോസ്, ഒ. ശ്രീനാഥന്‍, നുഹ്മാന്‍ ഷിബിലി, വി. അബ്ദുസമദ് നേതൃത്വം നല്‍കി.