മലപ്പുറം: യു.പി.എക്ക് കീഴിലുള്ള ദേശീയ സഖ്യത്തിന് മാത്രമേ ഫാസിസ്റ്റ് ശക്തികള്‍ക്കെതിരായ പോരാട്ടത്തിന് കരുത്ത് പകരാനാകൂവെന്ന് മലപ്പുറം ലോക്‌സഭ മണ്ഡലം യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടി. മലപ്പുറം കലക്ട്രേറ്റില്‍ നടന്ന നാമനിര്‍ദേശ പത്രിക സൂക്ഷ്മ പരിശോധനക്ക് ശേഷം മാധ്യമ പ്രവര്‍ത്തകരോട് സംസാരിക്കുകയായിരുന്നു കുഞ്ഞാലിക്കുട്ടി. ബി.ജെ.പിക്കെതിരേ വിശാലമായൊരു സഖ്യമാണ് കോണ്‍ഗ്രസിന്റെ നേതൃത്വത്തില്‍ ലക്ഷ്യമിടുന്നത്. വര്‍ഗീയ ഫാസിസ്റ്റ് രാഷ്ട്രീയത്തിനെതിരായി ജനങ്ങള്‍ വിധിയെഴുതുമെന്ന് കുഞ്ഞാലിക്കുട്ടി പറഞ്ഞു. ഇന്നലെ രാവിലെ കാരാത്തോട്ടെ വസതിയില്‍ നിയോജക മണ്ഡലം പ്രസിഡന്റ്, സെക്രട്ടറിമാരുടെ യോഗത്തിലും ശേഷം 9.30ന് സ്വതന്ത്ര കര്‍ഷക സംഘം ഇലക്ഷന്‍ കാമ്പയിന്‍ ഉദ്ഘാടന കര്‍മ്മവും നിര്‍വ്വഹിച്ചാണ് ജില്ലാ മുസ്‌ലിം ലീഗ് ഓഫീസില്‍ പാണക്കാട് സയ്യിദ് സാദിഖലി ശിഹാബ് തങ്ങള്‍, പ്രൊഫ. കെ. ആബിദ് ഹുസൈന്‍ തങ്ങള്‍, അഡ്വ. എം. ഉമര്‍ എം.എല്‍.എ തുടങ്ങിയവരുമായി ചര്‍ച്ച നടത്തിയ ശേഷമാണ് സ്ഥാനാര്‍ഥി കലക്‌ട്രേറ്റില്‍ സൂക്ഷമ പരിശോധനക്കെത്തിയത്.
.