മണ്ണഞ്ചേരി: കേരളത്തെ ഞെട്ടിച്ച നിപാ വൈറസിന്റെ കടന്നുവരവിനെ നവമാധ്യമങ്ങളിലൂടെ ആഘോഷിക്കുന്നവരുടെ എണ്ണം പെരുകുന്നു. ജനങ്ങളിലേക്ക് അനാവശ്യമായി ഭീതി വിതറുന്നവരുടെ നേരെ നിയമനടപടികള്‍ സ്വീകരിച്ചതോടെ ഇപ്പോള്‍ ആശ്വാസ സന്ദേശങ്ങളുടെ പ്രവാഹമായി.
ഒപ്പം കൗതുകം നിറഞ്ഞ കമന്റുകളും രാഷ്ട്രീയനിറച്ചാര്‍ത്തും സജീവംതന്നെ. കഴിഞ്ഞ ദിവസങ്ങളില്‍ ജനങ്ങളെ ഭീതിയുളവാക്കുന്ന തരത്തിലുള്ള വീഡിയോ ക്ലിപ്പുകളുമായി ഫേസ് ബുക്കിലും വാട്‌സ് ആപ്പിലും നിറഞ്ഞവര്‍ ഇപ്പോള്‍ പുലിവാല് പിടിച്ച സ്ഥിതിയായി. ഇവര്‍ക്കെതിരെ കര്‍ശനനടപടികളാണ് പൊലിസും ബന്ധപ്പെട്ടവരും സ്വീകരിച്ചത്.
ഇന്നലെ നിപയ്‌ക്കെതിരായുള്ള പ്രതിരോധ മരുന്നുകളുടെ കുറിപ്പടികാലമായിരുന്നു. ചില കുറിപ്പടിക്കാര്‍ ദേവതാരു കുറിച്ചപ്പോള്‍ മറ്റൊരുകൂട്ടര്‍ ഇതിന്റെ മറ്റൊരു നാമമായ പവിഴമല്ലിയാണ് പ്രയോഗിച്ചത്. ദേവതാരുവിന്റെ ഇല കഷായം നാരാങ്ങാനീരില്‍ സേവിച്ചാല്‍ നിപ്പ അടുത്ത വഴിയേപോലും വരില്ലെന്ന് ഇവര്‍ സാക്ഷ്യപ്പെടുത്തി.
പഴയ ചേരുവകയിലെ കരിപ്പെട്ടി കാപ്പി ഉടന്‍ ഉപയോഗിച്ചുതുടങ്ങാന്‍ ചില കുട്ടിവൈദ്യര്‍ ആഹ്വാനം ചെയ്തു. എന്നാല്‍ ബഹുഭൂരിപക്ഷവും ചെറുനാരങ്ങാനീരില്‍ ഉറച്ചുനിന്നപ്പോല്‍ മാര്‍ക്കറ്റില്‍ നാരാങ്ങാ കച്ചവടം പൊടിപൊടിച്ചനിലയായി.
ഉത്തര്‍പ്രദേശില്‍ പനിമരണം സംഭവിച്ചാല്‍ മുഖ്യമന്ത്രി കുഴപ്പക്കാരന്‍ കേരളത്തില്‍ ഇത്തരം മരണം വന്നാല്‍ വവ്വാലിന്റെ തലയില്‍ കെട്ടിവയ്ക്കല്‍ കഷ്ടംതന്നെ എന്ന രാഷ്ടീയ കമന്റുകളും ഇക്കൂട്ടത്തില്‍പ്പെടുന്നുണ്ട്. മെഡിക്കല്‍ കോളേജ് ആശുപത്രിയുടെ മുന്നിലെ വൈദ്യുതി കമ്പിയില്‍ വവ്വാല്‍ ഷോക്കേറ്റ ചിത്രം കൊടുത്ത വിരുതന്‍ ആരോപണം സഹിക്കാതെ ആശുപത്രിക്കുമുന്നില്‍ വവ്വാല്‍ ആത്മഹത്യചെയ്തതായി കുറിച്ചു.