കോതമംഗലം: നൂറ് ശതമാനം വിജയം കൈവരിച്ച പിണവൂര്‍കുടിയിലെ ആദിവാസി കുട്ടികള്‍ മാത്രം പഠിക്കുന്ന സ്‌കൂളിന് ബസ് സമ്മാനിച്ചു. എം.കെ സാനു മാസ്റ്റര്‍ അധ്യക്ഷനായുള്ള അജു ഫൗണ്ടേഷനാണ് ബസ് നല്‍കിയത്. വിജയം നേടിയ കുട്ടികളെ അഭിനന്ദിക്കുന്നതിനായി സ്‌കൂളിലെത്തിയ ഫൗണ്ടേഷന്‍ അംഗമായ ഗോപി കോട്ടമുറിയ്ക്കലാണ് സ്‌കൂളിന് ബസ് നല്‍കാമെന്നേറ്റത്.
ഇന്നലെ പിണവൂര്‍കുടി കമ്മ്യൂണിറ്റി ഹാളില്‍ നടന്ന ചടങ്ങില്‍ ജോയ്‌സ് ജോര്‍ജ് എം.പി ബസിന്റെ താക്കോല്‍ സ്‌കൂള്‍ ഹെഡ് മാസ്റ്റര്‍ കെ.കെ ശിവദാസിന് കൈമാറി.
സ്‌കൂളിലെ വിദ്യാര്‍ഥികള്‍ക്കും അധ്യാപകര്‍ക്കും നല്‍കിയ സ്വീകരണവും സാംസ്‌കാരികോത്സവവും എം.പി ഉദ്ഘാടനം ചെയ്തു. ആന്റണി ജോണ്‍ എം.എല്‍.എ അധ്യക്ഷത വഹിച്ചു. എസ്.ഇ.ആര്‍.ടി ഡയറക്ടര്‍ ഡോ. ജയപ്രസാദ് കുട്ടികള്‍ക്കും അധ്യാപകര്‍ക്കുമുള്ള ഉപഹാരങ്ങള്‍ വിതരണം ചെയ്തു. ആര്‍. അനില്‍കുമാര്‍, വിജയമ്മ ഗോപി, ഷീല കൃഷ്ണന്‍കുട്ടി, ഉഷ അയ്യന്‍ പിള്ള, കെ.എംദിലിപ്, ബാബു പുരുഷോത്തമന്‍, സുശില ലൗജന്‍, വി.ഇ ജോയ് എന്നിവര്‍ സംസാരിച്ചു