പാനൂര്‍: സി.പി.എം ഏരിയാ സെക്രട്ടറി കെ.കെ പവിത്രന്റെ ഡ്രൈവറെ വീട്ടില്‍ കയറി മര്‍ദിച്ച സംഭവത്തില്‍ ഒരാള്‍ അറസ്റ്റില്‍. അരയാക്കൂല്‍ ജമ്മീന്റവിട ബിഗേഷിനെ മര്‍ദിച്ച സംഭവത്തിലാണ് മനേക്കരയിലെ പുതിയ പുരക്കല്‍ സഹ്യനെ പാനൂര്‍ എസ്.ഐ എം.എസ് ഫൈസലും സംഘവും കഴിഞ്ഞ ദിവസംപുലര്‍ച്ചെ അറസ്റ്റുചെയ്തത്. സഹ്യനെ കോടതി രണ്ടാഴ്ചത്തേക്ക് റിമാന്‍ഡ് ചെയ്തു. കേസില്‍ ബിഗേഷിന്റെ സഹോദരന്‍ ബിജു ഉള്‍പ്പടെ ഏഴു പേരാണ് പ്രതികള്‍. മറ്റ് പ്രതികള്‍ക്കായുള്ള തിരച്ചില്‍ ഊര്‍ജിതമാക്കിയതായി എസ്.ഐ പറഞ്ഞു. വധശ്രമം ഉള്‍പ്പടെ ജാമ്യമില്ലാ വകുപ്പുകളാണ് പ്രതികള്‍ക്കെതിരെ ചുമത്തിയത്.