കോഴിക്കോട്: പുതിയ തലമുറയുടെ ഭാഷയും ഭാവുകത്വവും അപ്രതീക്ഷിതമായ വേഗത്തില്‍ മാറിക്കൊണ്ടിരിക്കുകയാണെന്നും എഴുത്തുകാര്‍ അതിനുസൃതമായി വളരേണ്ടതുണ്ടെന്നും ശിഹാബുദ്ദീന്‍ പൊയ്ത്തുംകടവ്.
തനിമ കലാസാഹിത്യവേദി സാഹിത്യപുരസ്‌കാരം അബൂബക്കര്‍ കാപ്പാടിന് നല്‍കി സംസാരിക്കുകയായിരുന്നു അദ്ദേഹം. മലയാളത്തിലെ ബാലസാഹിത്യ രംഗം ഇപ്പോഴും മാറ്റങ്ങളില്ലാതെ തുടരുകയാണ്.
പുതിയ തലമുറയുടെ വിനോദങ്ങളിലും മൂല്യസങ്കല്‍പങ്ങളിലും ഉള്ള മാറ്റങ്ങള്‍ ബാലസാഹിത്യരംഗം വേണ്ടരീതിയില്‍ ഉള്‍ക്കൊള്ളുന്നില്ല എന്നും അദ്ദേഹം പറഞ്ഞു. അബൂബക്കര്‍ കാപ്പാടിന്റെ 'ചൊല്ലും ചേലും' എന്ന കൃതിക്കാണ് ഈ വര്‍ഷത്തെ തനിമ പുരസ്‌കാരം ലഭിച്ചത്. ഇതോടനുബന്ധിച്ച് തനിമ സംഘടിപ്പിച്ച എഴുത്തൊരുമ സാംസ്‌കാരിക കൂട്ടായ്മയില്‍ ടി മുഹമ്മദ് പ്രഭാഷണം നിര്‍വഹിച്ചു.
ആദം അയൂബ്, ഡോ. ഹിക്മത്തുള്ള, ഗിരിജ പാതേക്കര, മുഖ്ദാര്‍ ഉദിരംപൊയില്‍, ഡോ. എം ഷാജഹാന്‍, കലാം വെള്ളിമാട്, ഫൗസിയ ഷംസ്, കെ.വി സക്കീര്‍ ഹുസൈന്‍, എസ്.എ ഖുദ്‌സി, ജ്യോതി, പ്രദീപന്‍ രാമനാട്ടുകര, അജിജേഷ് പാച്ചാട്ട്, യാസര്‍ അറഫാത്ത്, ബിനീഷ് വൈദ്യരങ്ങാടി സംസാരിച്ചു.