കണ്ണൂര്‍: സത്യവിശ്വാസികള്‍ രോഗത്തെ ഭയപ്പെടുകയല്ല മറിച്ച് അവ ജീവിത പരീക്ഷണമായി ഏറ്റെടുക്കുകയാണ് വേണ്ടതെന്ന് സമസ്ത കേരള ജംഇയ്യത്തുല്‍ ഉലമ ജില്ലാ ജനറല്‍ സെക്രട്ടറിയും മുശാവറ അംഗവുമായ മാണിയൂര്‍ അഹമദ് മുസ്‌ല്യാര്‍. എളയാവൂര്‍ സി.എച്ച് സെന്ററിന്റെ ആഭിമുഖ്യത്തില്‍ വാരത്ത് തുടക്കം കുറിച്ച ഫിസിക്കല്‍ മെഡിസിന്‍ ആന്‍ഡ് റീഹാബിലിറ്റേഷന്‍ സെന്ററിന്റെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. യഥാര്‍ഥ വിശ്വാസികള്‍ രോഗത്തെ ഭയപ്പെടുകയില്ല. ലോകത്ത് എല്ലാതരം രോഗങ്ങള്‍ക്കും മരുന്നുണ്ട്. മഹത്തരമായ സാന്ത്വന പ്രവര്‍ത്തനങ്ങള്‍ നടത്തി വരുന്ന എളയാവൂര്‍ സി.എച്ച് സെന്ററിന്റെ സേവനങ്ങള്‍ ഏറെ പ്രശംസനീയമാണെന്നും ഇതിനെ എല്ലാ നിലയിലും സഹായിക്കാന്‍ സമൂഹത്തിന് ഉത്തരവാദിത്വമുണ്ടെന്നും അദ്ദേഹം കൂട്ടിച്ചേര്‍ത്തു. ചടങ്ങില്‍ പി.കെ ഇസ്മത്ത് അധ്യക്ഷനായി. ഡോ. എം.സി ജയറാം, അഡ്വ.പി.വി സൈനുദ്ദീന്‍, അന്‍സാരി തില്ലങ്കേരി, കെ.പി താഹിര്‍, എസ്.വി മുഹമ്മദലി, പി.
പി സുബൈര്‍, പി.സി അഹമ്മദ്കുട്ടി, എസ്.എല്‍.പി മുഹമ്മദ് കുഞ്ഞി, ടി.പി അബ്ബാസ് ഹാജി, റസാഖ് അല്‍ വസല്‍, സത്താര്‍ എന്‍ജിനിയര്‍, ഹുസൈന്‍ ബാഖവി, ഹബീബ് അസ്ഹരി, നസീര്‍ നെല്ലൂര്‍, കെ.പി.കെ വെങ്ങര, സി.എച്ച് മുഹമ്മദ് അഷ്‌റഫ്, കെ.എം ഷംസുദ്ദീന്‍ സംസാരിച്ചു.