എരുമപ്പെട്ടി: കടങ്ങോട് പഞ്ചായത്തിലെ പാഴിയോട്ട്മുറിയില്‍ കുന്നിടിച്ച് വന്‍തോതിലുള്ള മണ്ണെടുപ്പ് നടത്തുന്നു. അധികൃതരുടെ ശ്രദ്ധയില്‍പ്പെട്ടിട്ടും നടപടിയെടുക്കുന്നില്ലെന്ന് ആക്ഷേപം ഉയര്‍ന്നിട്ടുണ്ട്.
പാഴിയോട്ട്മുറി-തെക്ക്മുറി റോഡില്‍ ഖാദി വ്യവസായ കേന്ദ്രത്തിനുസമീപമാണ് അനധികൃതമായി കുന്നിടിച്ച് മണ്ണെടുപ്പ് നടക്കുന്നത്. അര്‍ധരാത്രി മുതല്‍ പുലര്‍ച്ചെവരെ നടക്കുന്ന മണ്ണെടുപ്പിന് അധികൃതര്‍ കൂട്ടുനില്‍ക്കുകയാണെന്നു നാട്ടുകാര്‍ ആരോപിക്കുന്നു.
രാത്രി നിരവധി ടിപ്പര്‍ ലോറികള്‍ ഉപയോഗിച്ച് കടത്തുന്ന മണ്ണ് വയല്‍ നികത്താനാണ് ഉപയോഗിക്കുന്നതെന്നും ആരോപണമുണ്ട്.
കടുത്ത ജലക്ഷാമം നേരിടുന്ന സാഹചര്യമായിട്ടും കടങ്ങോട് പഞ്ചായത്തിലെ വിവിധ പ്രദേശങ്ങളില്‍ വന്‍തോതിലുള്ള മണ്ണെടുപ്പ് തുടരുകയാണ്. ഇതിനെതിരേ അധികൃതര്‍ കണ്ണടയ്ക്കുന്നത് വ്യാപക പ്രതിഷേധത്തിനിടയാക്കിയിട്ടുണ്ട്.