വടക്കാഞ്ചേരി: നഗരസഭയിലെ മൂന്ന് ഡിവിഷനുകളിലെ 300ഓളം കുടുംബങ്ങള്‍ കുളിക്കാനും വസ്ത്രങ്ങള്‍ അലക്കാനും ഉപയോഗിക്കുന്ന കൊളാടിക്കുളം അടിയന്തരമായി ശുദ്ധീകരിക്കണമെന്ന് ആവശ്യപ്പെട്ട് നാട്ടുകാര്‍ പ്രക്ഷോഭത്തിലേക്ക്. അധികൃതരുടെ അനാസ്ഥയില്‍ പ്രതിഷേധിച്ച് ജില്ലാ കലക്ടര്‍ക്കും തദ്ദേശ സ്വയംഭരണ വകുപ്പുമന്ത്രിക്കും നിവേദനം നല്‍കാന്‍ തീരുമാനിച്ചു.
പായലും ചണ്ടിയും നീക്കുന്നതിനും നഗരസഭയുടെ ഭാഗത്തുനിന്ന് ഒരു നടപടിയുമുണ്ടാകുന്നില്ലെന്നും പ്രദേശത്തെ യുവാക്കളും ജനങ്ങളും കുറ്റപ്പെടുത്തുന്നു. ഇതിനെതിരേ നഗരസഭാ സെക്രട്ടറിക്ക് നിവേദനം നല്‍കിയിട്ടും നടപടി ഉണ്ടാകാത്തതിനെ തുടര്‍ന്നാണ് കലക്ടര്‍ക്കും തദ്ദേശ സ്വയംഭരണ വകുപ്പിനും നിവേദനം നല്‍കാന്‍ തീരുമാനിച്ചത്.