പൊന്നാനി: കഞ്ചാവ് മൊത്തവിതരണക്കാരന്‍ യുവാവിനെ കൊലപ്പെടുത്താന്‍ ശ്രമിച്ചതായി പരാതി. കുത്തേറ്റ യുവാവ് ഗുരുതര പരുക്കോടെ ചികിത്സയില്‍. പൊന്നാനിയിലും പരിസര പ്രദേശങ്ങളിലും കഞ്ചാവ് വില്‍പന നടത്തുന്ന പൊന്നാനി ഹിളര്‍പള്ളി സ്വദേശി ഷമീറാണ് യുവാവിനെ കത്തികൊണ്ടു കുത്തിയത്. കഴിഞ്ഞ ദിവസം രാത്രിയാണ് സംഭവം.
ഹിളര്‍പള്ളി സ്വദേശിയായ ഉണ്ണിത്തായാല്‍ ലത്വീഫ് കടയടച്ച് വീട്ടില്‍ പോകുന്ന സമയത്തു പൊന്നാനി എം.ഇ.എസ് കോളജിനു പിന്‍വശത്തുവച്ചു കഞ്ചാവ് ഉപയോഗിക്കുകയായിരുന്ന ഷമീറിനോട് വഴിമാറാന്‍ ആവശ്യപ്പെട്ടതിനെ തുടര്‍ന്നാണ് കഞ്ചാവ് ലഹരിയിലായിരുന്ന ഇയാള്‍ കത്തികൊണ്ടു കുത്തിയത്.
ശരീരത്തിന്റെ പിന്‍ഭാഗത്തു കുത്തിയതിനെ തുടര്‍ന്ന് ആഴത്തിലുള്ള മുറിവുണ്ടായി. തുടര്‍ന്ന് ഇയാള്‍ പിന്നീട് കഴുത്തിലും മുഖത്തും കുത്താന്‍ ശ്രമിച്ചെങ്കിലും ലത്വീഫ് തടയുകയായിരുന്നു. രക്തംവാര്‍ന്നു ബോധരഹിതനായ ലത്വീഫിനെ ഇതുവഴി വന്ന ബൈക്ക് യാത്രികരാണ് ആശുപത്രിയിലെത്തിച്ചത്.
സംഭവത്തില്‍ പൊലിസ് കേസെടുത്ത് അന്വേഷണമാരംഭിച്ചു. ലത്വീഫ് മെഡിക്കല്‍ കോളജില്‍ ചികിത്സയിലാണ്.