കൊട്ടിയം: ആശ്രാമം മൈതാനം കേന്ദ്രമാക്കി വികസന പ്രവര്‍ത്തനങ്ങള്‍ നടപ്പിലാക്കിയാല്‍ കൊല്ലത്തെ ഡ്രീം സിറ്റിയാക്കി മാറ്റാമെന്ന കണ്ടെത്തലുമായി എന്‍ജിനിയറിങ് വിദ്യാര്‍ത്ഥികള്‍. വടക്കേവിള യൂനുസ് കോളജ് ഓഫ് എന്‍ജിനിയറിങിലെ അവസാന വര്‍ഷ സിവില്‍ വിഭാഗം വിദ്യാര്‍ത്ഥികളാണ് പുതിയ  പ്രോജക്റ്റുമായി രംഗത്തെത്തിയിട്ടുള്ളത്. നവകേരളാ മിഷന്റെ ഭാഗമായി മേയര്‍ വിളിച്ചു ചേര്‍ത്ത യോഗത്തില്‍ പങ്കെടുത്ത യൂനുസ് കോളജിലെ വിദ്വാര്‍ ത്തി സോഹെബ് നജാദിന്റെ നേതൃത്വത്തിലാണ് ഈ പ്രോജക്റ്റ് തയാറാക്കിയിട്ടുള്ളത്.
നഗരസൗന്ദര്യവല്‍ക്കരണം, മാലിന്യ സംസ്‌കരണം, വ്യവസായ മേഖല, കുടിവെള്ളം, വൈദ്യുതി ഉല്‍പ്പാദനം, പരിസ്ഥിതി സംരക്ഷണം, ഗതാഗത പരിഷ്‌കരണം, സാമൂഹ്യക്ഷേമം എന്നിവ  ഉള്‍പ്പെടുത്തിയുള്ള പ്രോജക്റ്റാണ് തയാറാക്കിയത്. 72 ഏക്കറുള്ള ആശ്രാമം മൈതാനത്ത് ഒരു മൊബിലിറ്റി ഹബ്ബ്, കൊല്ലം ട്രേഡ് സെന്റര്‍, വാട്ടര്‍ ട്രീറ്റ്‌മെമെന്റ് പ്ലാന്റ്, സ്‌റ്റേഡിയം, ഇലക്ടിക് വാഹനങ്ങളുടെ ചാര്‍ജിംഗ് സ്‌റ്റേഷന്‍, സോളാര്‍ പവര്‍ ജനറേറ്റിങ് സ്‌റ്റേഷന്‍, സൗജന്യ വൈ.ഫൈ, റിമോട്ട് സ്‌റ്റേഷന്‍ വഴിയുള്ള ട്രാഫിക് കണ്‍ട്രോള്‍ എന്നിവയാണ് പദ്ധതിയിലുള്ളത്. ഇത് നടപ്പിലാക്കാന്‍ കോര്‍പ്പറേഷന്‍ തയാറായാല്‍ കൊല്ലത്തെ ഒരു മാതൃകാ നഗരമാക്കി മാറ്റാനാകുമെന്നും വ്യവസായികളേയും വ്യാപാരികളേയും കൊല്ലത്തേക്ക് ആകര്‍ഷിക്കാന്‍ കഴിയുമെന്നും ഇവര്‍ പറയുന്നു.
സൊഹാബ് നജാദ്, മറിയം ഫര്‍ഹാന, അഫ്‌സാ നാസിയാദ്, ഷിഫ, അനന്തപത്മനാഭന്‍ എന്നീ വിദ്യാര്‍ഥികളാണ് പ്രോജക്റ്റ് തയാറാക്കിയത്. അഷ്ടമുടി കായലില്‍ നിന്നുള്ള വെള്ളംശുദ്ധീകരിച്ച് നാലു ടാങ്കുകളിലാക്കി കച്ചവടം, ആശുപത്രി, കുടിവെള്ളം എന്നിവയ്ക്കായി വിതരണം ചെയ്യുവാനും, ഡാമുകള്‍ ഉല്‍പ്പാദിപ്പിക്കുന്നതിനേക്കാള്‍ കൂടുതല്‍വൈദ്യുതി ഉല്‍പ്പാദിപ്പിക്കുന്ന ഒരു സോളാര്‍ പവ്വര്‍ ജനറേറ്റിംഗ് സ്‌റ്റേഷനും കായിക മേഖലക്കായി ഒരു സിന്തറ്റിക് ഗ്രൗണ്ടും സാറ്റലൈറ്റ് സിഗ്‌നലുകളും സെന്‍സറുകളും ഉപയോഗിച്ചുള്ള ഗതാഗത നിയന്ത്രണവും ഈ പ്രോജക്റ്റിലുണ്ട്.