നെടുമങ്ങാട്: സമ്പൂര്‍ണ വൈദ്യുതീകരണം എന്ന മഹത്തായ നേട്ടം നടപ്പാക്കുന്നതിലൂടെ കേരളം ഇന്ത്യയിലെ മറ്റുസംസ്ഥാനങ്ങള്‍ക്ക് മാതൃകയായി മാറിയതായി വൈദ്യത വകുപ്പുമന്ത്രി എം.എം മണി പറഞ്ഞു. നെടുമങ്ങാട് നിയോജകമണ്ഡലത്തിലെ സമ്പൂര്‍ണ വൈദ്യുതീകരണ പ്രഖ്യാപനം നടത്തി പ്രസംഗിക്കുകയായിരുന്നു അദ്ദേഹം. വൈദ്യുതി ഇല്ലാത്ത വീടുകളില്‍ വൈദ്യുതി എത്തിക്കുക എന്ന എല്‍.ഡി.എഫ് വാഗ്ദാനം നടിപ്പിലാക്കാന്‍ കഴിഞ്ഞത് കെ.എസ്.ഇ.ബി ജീവനക്കാരുടെ അക്ഷീണ പരിശ്രമം കൊണ്ടാണെന്നു മന്ത്രി പറഞ്ഞു. ഈ നേട്ടം കൈവരിച്ചതില്‍ ജീവനക്കാരെ മന്ത്രി പ്രത്യേകം അഭിനന്ദിച്ചു .
സി ദിവാകരന്‍ എം.എല്‍.എ അധ്യക്ഷത വഹിച്ചു. പദ്ധതി നടപ്പിലാക്കിയതിലൂടെ നെടുമങ്ങാട് മണ്ഡലത്തിലെ 1200 പാവപ്പെട്ട  കുടുംബങ്ങളുടെ വീടുകളില്‍ വൈദ്യുതി കണക്ഷന്‍ ലഭിച്ചു. ഇതിനു ചിലവായ ഒരു കോടി രണ്ടു ലക്ഷംരൂപയില്‍ സി ദിവാകരന്‍ എം.എല്‍.എ ഫണ്ടില്‍ നിന്നും 26 ലക്ഷം രൂപ വിനിയോഗിച്ചു. കെ.എസ്.ഇ.ബി ഡെപ്യൂട്ടി ചീഫ് എഞ്ചിനീയര്‍ സി.എസ് ശശാങ്കന്‍ നായര്‍ റിപ്പോര്‍ട്ട് അവതരിപ്പിച്ചു. നഗരസഭാ ചെയര്‍മാന്‍ ചെറ്റച്ചല്‍ സഹദേവന്‍, ബ്ലോക്ക് പഞ്ചായത്ത് പ്രസിഡന്റ് ബി. ബിജു, അഡ്വ ആര്‍ ജയദേവന്‍ , പാട്ടത്തില്‍ ഷെരിഫ്, പൂവത്തൂര്‍ ജയന്‍, പഞ്ചായത്തു പ്രസിഡന്റുമാര്‍, വിവിധ രാഷ്ട്രീയ കക്ഷി നേതാക്കള്‍, ജനപ്രതിനിധികള്‍, കെ.എസ്.ഇ.ബി ജീവനക്കാര്‍ പങ്കെടുത്തു.
നെടുമങ്ങാട് നഗരസഭയിലെ സ്ട്രീറ്റ് ലൈറ്റുകള്‍ എല്‍.ഇ.ഡി ബള്‍ബ് ആക്കി മാറ്റുന്നതിന്റെ ഉദ്ഘാടനവും മന്ത്രി നിര്‍വഹിച്ചു.