കോതമംഗലം: മാര്‍ അത്തനേഷ്യസ് സ്‌പോര്‍ട്‌സ് അക്കാദമിയുടെ ആഭിമുഖ്യത്തില്‍ എം.എ കോളജ് സ്വിമ്മിങ്പൂളില്‍ നടന്നു വന്ന അവധിക്കാല നീന്തല്‍ പരിശീലന ക്യാംപ് അവസാനിച്ചു. ഒന്നര മാസത്തോളം നീണ്ടു നിന്ന ക്യാംപില്‍ നാല് വയസിന് മുകളിലുള്ള കുട്ടികളടക്കം 250 പേര്‍ പങ്കെടുത്തു. സ്വിമ്മിങ്പൂളില്‍ നടന്ന സമാപന ചടങ്ങില്‍ കോളജ് പ്രിന്‍സിപ്പല്‍ ഡോ. ഡെന്‍സിലി ജോസ് പങ്കെടുത്തവര്‍ക്കുള്ള സര്‍ട്ടിഫിക്കറ്റുകള്‍ വിതരണം ചെയ്തു.
എം.എ എന്‍ജിനിയറിങ് കോളജ് മുന്‍ പ്രിന്‍സിപ്പല്‍ ഡോ. എം.ജി ഗ്രേഷ്യസ്, മാര്‍ ബേസില്‍ സ്‌കൂള്‍ പ്രിന്‍സിപ്പല്‍ ജോര്‍ജ് മാത്യൂ, ഫിസിക്കല്‍ എഡ്യൂക്കേഷന്‍ അസിസ്റ്റന്റ് പ്രൊഫ.ഹാരി ബെന്നി, മുന്‍ വിജിലന്‍സ് എസ്.ഐ ബാലാജി എന്നിവര്‍ സംസാരിച്ചു. പരിശിലനത്തിനായി രക്ഷിതാക്കളുടെയും കുട്ടികളുടെയും ഭാഗത്ത് നിന്ന് ലഭിച്ച സഹകരണം പ്രോത്സാഹജനകമാണെന്നും ഭാവിയില്‍ ഇത്തരത്തിലുള്ള ക്യാംപുകള്‍ നടത്താന്‍ ഉദ്ദേശിക്കുന്നതായും എം.എ കോളജ് അസോസിയേഷന്‍ സെക്രട്ടറി ഡോ.വിന്നി വര്‍ഗീസ് പറഞ്ഞു.