പാനൂര്‍: വനിതാ കോല്‍ക്കളി സംഘത്തിന്റെ കളരി അരങ്ങേറ്റവും കളരി ഒഴിയല്‍ ചടങ്ങും നടന്നു. പടിഞ്ഞാറെ മൊകേരി നവോദയം വായനശാല ആന്റ് ഗ്രന്ഥാലയത്തിന്റെ നേതൃത്വത്തിലാണ് പ്രദേശത്തെ വനിതകള്‍ക്കായി കോല്‍ക്കളി പരിശീലനം നല്‍കിയത്.
അന്യം നിന്നുപോകുന്ന പ്രാദേശിക കലാരൂപങ്ങളെ സംരക്ഷിക്കുന പ്രവര്‍ത്തനങ്ങളുടെ ഭാഗമായാണ് നവോദയം വായനശാല വനിതകള്‍ക്കായി കോല്‍ക്കളി പരിശീലനം ഒരുക്കിയത്. പ്രദേശത്തെ നിരവധി വനിതകളാണ് മൂന്ന് മാസക്കാലം നീണ്ടു നിന്ന പരിശീലനത്തില്‍ പങ്കെടുത്തത്. അരങ്ങേറ്റത്തില്‍ പങ്കാളികളാകാന്‍ നിരവധി പ്രദേശവാസികളാണെത്തിയത്. പാനൂരിലെ കെ.കെ.നാണു ആശാനും കുന്നോത്ത് പറമ്പിലെ കെ.കുമാരനുമാണ് പരിശീലനം നല്‍കിയത്. ശാരീരികവും മാനസികവുമായ ഉന്മേഷം കോല്‍ക്കളി പരിശീലനത്തിലൂടെ ലഭിച്ചതായി വനിതകള്‍ പറയുന്നു. കണ്ണൂര്‍ ജില്ലാ പഞ്ചായത്ത് ക്ഷേമകാര്യ സ്റ്റാന്റിങ് കമ്മിറ്റി അധ്യക്ഷ ടി.ടി. റംല അരങ്ങേറ്റം ഉദ്ഘാടനം ചെയ്തു. കെ.എം.ഗോവിന്ദന്‍ അധ്യക്ഷനായി. മൊകേരി പഞ്ചായത്ത് വൈസ് പ്രസിഡന്റ് പി. വല്‍സന്‍, ടി.ഇ.സുനില്‍കുമാര്‍, വി.ശശി സംസാരിച്ചു.