ഫറോക്ക്: റോഡരികിലെ കെട്ടിടത്തില്‍ നിര്‍ത്തിയിട്ട ഓട്ടോറിക്ഷ കാണാതായതായി പരാതി.
കൊളത്തറ വടക്കേ ജുമുഅത്ത് പള്ളിക്കു മുന്‍വശത്ത് ഞായറാഴ്ച രാത്രി 11നും തിങ്കളാഴ്ച പുലര്‍ച്ചെ നാലിനും ഇടയിലാണു മോഷണം നടന്നത്. കൊളത്തറ പള്ളിത്താഴം സ്വദേശി കുഴിപ്പള്ളി വിജിത്തിന്റെ ഉടമസ്ഥതയിലുള്ള കെ.എല്‍ 11 എ.ക്യു 4322 എന്ന നമ്പറിലുള്ള ടി.വി.എസ് കമ്പനിയുടെ എല്‍.പി.ജി കണക്ഷനോടു കൂടിയുള്ള ഓട്ടോറിക്ഷയാണ് കാണാതായത്. ജോലി കഴിഞ്ഞ് വീടിനു സമീപത്തെ കെട്ടിടത്തിലെ കടയുടെ മുന്നിലാണ് പതിവായി ഓട്ടോറിക്ഷ നിര്‍ത്തിയിടാറുള്ളത്.
കഴിഞ്ഞദിവസം രാത്രി 9.30ന് ഇതേ സ്ഥലത്ത് പാര്‍ക്ക് ചെയ്ത് വീട്ടിലേക്ക് പോയ വിജിത്ത് ഇന്നലെ പുലര്‍ച്ചയോടെയാണ് കാണാതായ വിവരം അറിയുന്നത്. സമീപത്തെ സി.സി.ടി.വി ദൃശ്യങ്ങളും പ്രദേശങ്ങളിലും പരിശോധന നടത്തിയെങ്കിലും കണ്ടെത്താനായില്ലെന്നും നല്ലളം പൊലിസില്‍ പരാതി നല്‍കുമെന്നും വിജിത്ത് പറഞ്ഞു.