കാസര്‍കോട്: മൊഗ്രാല്‍ പുത്തൂരില്‍ ബാര്‍ബര്‍ ഷോപ്പിനു തീവച്ചു. പഞ്ചത്ത് കുന്നില്‍ താമസിക്കുന്ന എസ് മഞ്ചുനാഥി(24)ന്റെ ഉടമസ്ഥതയില്‍ മൊഗ്രാല്‍ പുത്തൂര്‍ ടൗണില്‍ പ്രവര്‍ത്തിക്കുന്ന ബാര്‍ബര്‍ ഷോപ്പിനാണു തീവച്ചത്. ഇന്നലെ പുലര്‍ച്ചെയാണു സംഭവം. സമീപത്തെ ക്വാര്‍ട്ടേഴ്‌സില്‍ താമസിക്കുന്നവരാണ് ബാര്‍ബര്‍ ഷോപ്പ് കത്തുന്നത് കണ്ടത്. ഉടന്‍ തന്നെ മഞ്ചുനാഥനെ വിവരമറിയിക്കുകയായിരുന്നു. കട പൂര്‍ണമായും കത്തിയിട്ടുണ്ട്. പിറകുവശത്തെ വാതില്‍ പൊളിച്ചനിലയിലാണ്. ഇതു വഴിയാണു തീയിട്ടതെന്നു സംശയിക്കുന്നു. വിവരമറിഞ്ഞ് കാസര്‍കോട് പൊലിസെത്തി അന്വേഷണമാരംഭിച്ചു. മൂന്നു ദിവസം മുമ്പ് മൊഗ്രാല്‍ പുത്തൂര്‍ കടവത്തെ ഒരു കടക്കും തീവച്ചിരുന്നു. ഈ കേസിലും പൊലിസ് അന്വേഷണം നടന്നുവരികയാണ്. ബാര്‍ബര്‍ഷോപ്പിനു തീവച്ച സംഭവത്തില്‍ കേരള സ്റ്റേറ്റ് ബാര്‍ബേര്‍സ് ആന്റ് ബ്യൂട്ടിഷന്‍ അസോസിയേഷന്‍ ജില്ലാ കമ്മിറ്റിയും താലൂക്ക് കമ്മിറ്റിയും ബ്ലോക്ക് കമ്മിറ്റിയും പ്രതിഷേധിച്ചു.