കാസര്‍കോട്: ജില്ലയില്‍ തുടരുന്ന കനത്തമഴയിലും കാറ്റിലും മിന്നലിലും വ്യാപക നഷ്ടം. കാറ്റില്‍ നിരവധി വീടുകള്‍ തകര്‍ന്നപ്പോള്‍ മിന്നലില്‍ വ്യാപക നഷ്ടമുണ്ടായി. കൂടാതെ മിന്നലില്‍ പരുക്കേറ്റ നിരവധിപേരെ വിവിധ ആശുപത്രികളില്‍ പ്രവേശിപ്പിച്ചു.
മയില്‍പാറയിലെ കരീം മയില്‍പാറയുടെ വീട്ടിലെ ഇലക്‌ട്രോണിക്‌സ് ഉപകരണങ്ങള്‍ കത്തിനശിച്ചു. ഉമ്മ സല്‍മ (65), ഭാര്യ നജ്മുന്നിസ (28) എന്നിവര്‍ക്ക് ഷോക്കേറ്റു. കുന്നിലിലെ കരീമിന്റെ വീട്ടിലും നാശനഷ്ടമുണ്ടായി. ഭാര്യ റയ്യാന (30)ക്ക് പരുക്കേറ്റു. എരിയാല്‍ അഷ്‌റഫിന്റെ വീട്ടിലെ വൈദ്യുതി മീറ്ററും സ്വിച്ചും തകര്‍ന്നു. ഇവിടെ താമസിച്ചുവന്നിരുന്ന അണങ്കൂര്‍ ബഷീറിന് പരുക്കേറ്റു. കല്ലങ്കൈയിലെ ബി.എച്ച് സുലൈമാന്റെ വീട്ടിലെ ഫോണും അനുബന്ധ ഉപകരണങ്ങളും നശിച്ചു. മഞ്ഞംപാറയില്‍ അബ്ദുറഹ്മാന്റെ വീട്ടിലെ വൈദ്യുതി മീറ്റര്‍ പൊട്ടിത്തെറിച്ചു. ഇലക്‌ട്രോണിക്‌സ് ഉപകരണങ്ങള്‍ക്കും നാശനഷ്ടമുണ്ടായി. വിദ്യാഗിരി പഞ്ചിക്കല്ലിലെ നഫീസയുടെ വീട്ടില്‍ ഇടിമിന്നലേറ്റ് ഇലക്ട്രോണിക് ഉപകരണങ്ങള്‍ കത്തിനശിച്ചു. ഭിത്തിയില്‍ വിള്ളല്‍ വീണു. വീടിന്റെ മുന്‍വശം ഭാഗികമായി തകര്‍ന്നു. ബിര്‍മിനടുക്കയിലെ നഫീസയുടെ വീട്ടിലെ ഇലക്ട്രോണിക് ഉപകരണങ്ങള്‍ കത്തിനശിച്ചു.
ബദിയഡുക്ക: കഴിഞ്ഞ ദിവസം ആഞ്ഞടിച്ച കാറ്റിലും മിന്നലിലും ബദിയഡുക്കയിലെ വിവിധ സ്ഥലങ്ങളില്‍ പരക്കെ നാശനഷ്ടം. അഞ്ചു വീടുകള്‍ക്ക് മിന്നലേറ്റു. ഒരാള്‍ക്ക് പൊള്ളലേറ്റു. വൈദ്യുതി ഉപകരണങ്ങള്‍ കത്തി നശിച്ചു. കാറ്റില്‍ നിരവധി വീടുകള്‍ തകര്‍ന്നു. മിന്നലേറ്റ് ഒരാള്‍ക്ക് പരിക്കേറ്റു.
മാന്യ ഉള്ളോടിയിലെ ഹമീദിന്റെ ഭാര്യ ഫരീദയുടെ ഓടുമേഞ്ഞ വീട് ഭാഗികമായി തകര്‍ന്നു. വീട്ടില്‍ ഫരീദയും മാതാവ് ആയിശയും രണ്ടു കുട്ടികളും മാത്രമാണുണ്ടായിരുന്നത്. രാത്രി ഏഴോടെ വീശീയ കാറ്റില്‍ വീട് തകരുന്ന ശബ്ദം കേട്ട് പുറത്തേക്ക് ഓടിയതിനാല്‍ ദുരന്തം ഒഴിവായി. ബേള പുതുക്കോളി ജയറാമിന്റെ വീടിനും ബിര്‍മ്മിനടുക്കയിലെ നബീസ, വിദ്യാഗിരി പഞ്ചിക്കല്‍ നബീസ എന്നിവരുടെ വീടുകള്‍ക്കും മിന്നലില്‍ നാശനഷ്ടമുണ്ടായി. ഇവിടങ്ങളിലെ വൈദ്യുതി മീറ്ററുകള്‍, വയറിങ്, ടിവി, ഫാന്‍, ബള്‍ബുകള്‍ എന്നിവ പൊട്ടിത്തെറിച്ചു. കൂടാതെ പഞ്ചിക്കല്ലിലെ നബീസയുടെ വീടിന്റെ ഭിത്തിക്ക് വിള്ളല്‍ വീണു. ഓടിട്ട വീടിന്റെ മേല്‍ക്കൂര ഭാഗികമായി തകര്‍ന്നു. പള്ളത്തടുക്ക വയനാട്ട് കുലവന്‍ വിഷ്ണുമൂര്‍ത്തി ദൈവസ്ഥാനത്തിനടുത്തുള്ള കൃഷ്ണന്റെ തറവാട് വീട് പൂര്‍ണമായും തകര്‍ന്നു. വീട്ടില്‍ താമസക്കാരനായ കൃഷ്ണന്‍ വീട്ടിലില്ലാതിരുന്നതിനാല്‍ വന്‍ ദുരന്തം ഒഴിവായി. പെരഡാലലിലെ രാമനായക്കിന്റെ ഭാര്യ പുഷ്പ (38)യെ മിന്നലില്‍ പൊള്ളലേറ്റ് കാസര്‍കോട് സ്വകാര്യ ആശുപത്രിയില്‍ പ്രവേശിപ്പിച്ചു.