കീവ്: ചാംപ്യന്‍സ് ലീഗ് ഫൈനലില്‍ ലിവര്‍പൂള്‍ ഗോള്‍കീപ്പര്‍ ലോറിയസ് കാര്യസിനെ കൈകൊണ്ടിടിച്ചതിന് റാമോസിനെതിരേ നടപടിയുണ്ടാകില്ലെന്ന് യുവേഫ അറിയിച്ചു. കളി പുരോഗമിക്കുന്നതിനിടെ റഫറി കാണാതെയായിരുന്നു റാമോസിന്റെ ഫൗള്‍.
കളിക്കിടെ റഫറി കാണാത്ത ഫൗളുകള്‍ വിഡിയോ പരിശോധിച്ച് റഫറിമാര്‍ നടപടിയെടുക്കാറുണ്ട്. വളരെ മോശമായ രീതിയിലുള്ള ഫൗളുകള്‍ക്കാണ് ഇത്തരത്തില്‍ കളി കഴിഞ്ഞ ശേഷം വിഡിയോ പരിശോധിച്ച് നടപടിയെടുക്കാറുള്ളത്. സലാഹിനെ ഫൗള്‍ ചെയ്തതോടെയാണ് കീപ്പറെയും റാമോസ് ഫൗള്‍ ചെയ്‌തെന്ന ആരോപണം ഉയര്‍ന്നത്. വിഡിയോ പരിശോധിച്ച യുവേഫ ഇക്കാര്യത്തില്‍ നടപടിയൊന്നുമില്ലെന്ന് വ്യക്തമാക്കി. അതേസമയം സലാഹിനെ ഫൗള്‍ ചെയ്തതിന് ഇപ്പോഴും പ്രതിഷേധം അടങ്ങിയിട്ടില്ല.
റാമോസിനെതിരേ നടപടി
ആവശ്യപ്പെട്ട് മൂന്നര ലക്ഷം
പേര്‍ ഒപ്പിട്ട ഹരജി
ലണ്ടന്‍: റയല്‍ മാഡ്രിഡ് താരം സെര്‍ജിയോ റാമോസിനെതിരേ നടപടിയെടുക്കണമെന്നാവശ്യപ്പെട്ട് മൂന്നര ലക്ഷം പേര്‍ ഒപ്പിട്ട ഹരജി ഫിഫക്കും യുവേഫക്കും സമര്‍പ്പിച്ചു. ചെയ്ഞ്ച്.ഓര്‍ഗ് എന്ന വെബ്‌സൈറ്റ് വഴിയാണ് ഒപ്പ് ശേഖരണം നടത്തിയത്. ചാംപ്യന്‍സ് ലീഗ് ഫൈനലിനിടെ ലിവര്‍പൂള്‍ താരം മുഹമ്മദ് സലാഹിനെ മനപ്പൂര്‍വമാണ് റാമോസ് പരുക്കേല്‍പിച്ചത് എന്നാരോപിച്ചാണ് അധികൃതര്‍ക്ക് ഹരജി കൈമാറിയത്. റാമോസിന്റെ ഫൗളില്‍ ആദ്യ പകുതിയില്‍ തന്നെ താരം പരുക്കേറ്റതിനെ തുടര്‍ന്ന് പുറത്ത് പോയിരുന്നു. മത്സര ശേഷം റാമോസ് ട്വിറ്ററിലൂടെ സലാഹിനോട് മാപ്പു പറഞ്ഞിരുന്നെങ്കിലും കനത്ത പ്രതിഷേധമായിരുന്നു ഫുട്‌ബോള്‍ ലോകത്ത്.