ദോഹ: പാസ്‌പോര്‍ട്ട്, അറ്റസ്റ്റേഷന്‍ ഉള്‍പ്പെടെയുള്ള കോണ്‍സുലര്‍ സര്‍വിസുകള്‍ ഔട്ട്‌സോഴ്‌സ് ചെയ്യുന്ന നടപടികള്‍ അന്തിമഘട്ടത്തില്‍. ഇതിനുള്ള ടെന്‍ഡര്‍ നടപടികള്‍ പൂര്‍ത്തിയായി. പുതിയ കമ്പനിയുമായി രണ്ടു ദിവസത്തിനകം കരാര്‍ ഒപ്പിടുമെന്നും മൂന്നു മാസത്തിനുള്ളില്‍ ഔട്ട്‌സോഴ്‌സിങ് കേന്ദ്രങ്ങള്‍ പ്രവര്‍ത്തനം തുടങ്ങുമെന്നും സ്ഥാനപതി പി കുമരന്‍ അറിയിച്ചു. ഏഴു റിയാലില്‍ താഴെയായിരിക്കും സര്‍വിസ് ചാര്‍ജ് . അല്‍ ഹിലാല്‍, സല്‍വ, അല്‍ഖോര്‍ എന്നിവിടങ്ങളിലാണ് കേന്ദ്രങ്ങള്‍ തുറക്കാനൊരുങ്ങുന്നത്.
പുതിയ ഔട്ട്‌സോഴ്‌സിങ് കേന്ദ്രങ്ങള്‍ പ്രവര്‍ത്തനം തുടങ്ങുന്നതോടെ ഇന്ത്യന്‍ കള്‍ച്ചറല്‍ സെന്ററിലെ (ഐ.സി.സി) കോണ്‍സുലര്‍ സര്‍വിസ് അവസാനിപ്പിക്കേണ്ടി വരും. നിലവില്‍ 10 റിയാലാണ് ഐ.സി.സിയിലെ സര്‍വിസ് ചാര്‍ജ്. 18 വയസിനു മുകളിലുള്ളവരുടെ പാസ്‌പോര്‍ട്ട്് പുതുക്കല്‍, വിദ്യാഭ്യാസ സര്‍ട്ടിഫിക്കറ്റ് ഒഴിച്ചുള്ള സര്‍ട്ടിഫിക്കറ്റ് അറ്റസ്റ്റേഷന്‍ എന്നിവയാണ് നിലവില്‍ ഐ.സി.സിയില്‍ ചെയ്തുകൊടുക്കുന്നത്. കുട്ടികളുടെ പാസ്‌പോര്‍ട്ട് പുതുക്കലിനും വിദ്യാഭ്യാസ സര്‍ട്ടിഫിക്കറ്റ് അറ്റസ്റ്റേഷനും എംബസിയെ നേരിട്ടു സമീപിക്കണം. എന്നാല്‍,ഔട്ട്‌സോഴ്‌സിങ് കേന്ദ്രങ്ങള്‍ തുടങ്ങുമ്പോള്‍ 18 വയസിനു താഴെയുള്ളവരുടെ പാസ്‌പോര്‍ട്ട് പുതുക്കാനും സൗകര്യമുണ്ടാവും.