വേങ്ങര: ഊരകം എം.യു.ഹയര്‍ സെക്കന്‍ഡറി സ്‌കൂള്‍ സ്‌കെച്ച് കലാ സ്റ്റുഡിയോ സര്‍വ ശിക്ഷാ അഭിയാന്‍ സംസ്ഥാന മികവ് ഉത്സവത്തില്‍ ഒന്നാമതെത്തി. 50 വിദ്യാര്‍ഥികള്‍ക്ക് ഒരേ സമയം ചിത്രരചനക്കും കലാ സൃഷ്ടികളുടെ പ്രദര്‍ശനത്തിനും സൗകര്യമുളള സംസ്ഥാനത്തെ ഏക സ്‌കൂള്‍ ആര്‍ട്ട് ഗാലറിയാണ് ഊരകം സ്‌കൂളിലേത്. ഊരകം ഗ്രാമ പഞ്ചായത്ത്, സ്‌കൂള്‍ മാനേജിങ് കമ്മിറ്റി എന്നിവയുടെ സഹകരണത്തോടെയാണ് ഗാലറി തുടങ്ങിയത്. വര ഉപകരണങ്ങളും ചായക്കൂട്ടുകളും യഥേഷ്ടം ലഭ്യമാക്കിയ ഗാലറിയില്‍ വിവിധ ഡോക്യുമെന്ററികളുടെ പ്രദര്‍ശനത്തിനും വിലയിരുത്തലിനും ഡിജിറ്റല്‍ തിയേറ്ററും ഒരുക്കിയിട്ടുണ്ട്. സമീപ സകൂളുകളിലെ വിദ്യാര്‍ഥികള്‍ക്ക് ആഴ്ചയില്‍ ഒരു തവണ സൗജന്യ പരിശീലനവും ഉണ്ട്. ചിത്രകലാ അധ്യാപകന്‍ ബഷീര്‍ ചിത്രകൂടത്തിന്റെ നേതൃത്വത്തിലാണ് വിദ്യാര്‍ഥികളുടെ കലാ മികവിന് അംഗീകാരം ഒരുക്കിയത്. വിദ്യാര്‍ഥികളുടെ നിരവധി ചിത്രപ്രദര്‍ശനങ്ങളും  ഇതിനോടകം ഗാലറിയില്‍ നടത്തിയിട്ടുണ്ട്.
ഫോട്ടോ. ഊരകം എം.യു.ഹയര്‍ സെക്കണ്ടറി സ്‌കൂള്‍ സ്‌കെച്ച് കലാ സ്റ്റുഡിയോയില്‍ വിദ്യാര്‍ഥികളുടെ ചിത്ര പ്രദര്‍ശനത്തില്‍ നിന്ന്.