മലപ്പുറം: മങ്കടയില്‍ യുവാവ് മര്‍ദനമേറ്റ് മരിച്ച കേസിലെ മുഖ്യപ്രതികള്‍ പിടിയില്‍. സുഹൈല്‍, സക്കീര്‍ എന്നിവരാണ് തമിഴ്‌നാട്ടില്‍ നിന്നും പിടിയിലായത്. തമിഴ്‌നാട് അതിര്‍ത്തിയായ ഗൂഢല്ലൂരില്‍ നിന്നാണ് ഇവരെ പൊലിസ് അറസ്റ്റ് ചെയ്തത്. നസീര്‍ കൊല്ലപ്പെട്ട ശേഷം ഇവര്‍ ഒളിവിലായിരുന്നു. കഴിഞ്ഞ ചൊവ്വാഴ്ച പുലര്‍ച്ചെയാണ് മങ്കട കൂട്ടിലില്‍ ഒറ്റക്ക് താമസിക്കുന്ന യുവതിയുടെ വീട്ടില്‍ സംശയാസ്പദമായ സാഹചര്യത്തില്‍ കണ്ട നസീറിനെ ഒരു കൂട്ടം നാട്ടുകാര്‍ സദാചാര പൊലിസ് ചമഞ്ഞ് മര്‍ദിച്ചത്. മര്‍ദനത്തെതുടര്‍ന്ന് അവശനിലയിലായ നസീര്‍ ആശുപത്രിയില്‍ വച്ച് മരണപ്പെടുകയായിരുന്നു. കേസിലെ നാലു പ്രതികളെ കഴിഞ്ഞ ദിവസം പൊലിസ് അറസ്റ്റ് ചെയ്തിരുന്നു.