കണ്ണൂര്‍: എസ്.എസ്.എല്‍.സി, പ്ലസ്ടു ചോദ്യ പേപ്പര്‍ ചോര്‍ന്നതില്‍ പ്രതിഷേധിച്ച് കെ.എസ്.യു ജില്ലാ കമ്മിറ്റി നടത്തിയ ഡി.ഡി.ഇ ഓഫിസ് മാര്‍ച്ചില്‍ സംഘര്‍ഷം. പൊലിസുകാര്‍ക്കും വാഹനത്തിനും നേരെയും കല്ലേറുണ്ടായി. സംഘര്‍ഷ സാധ്യത കണക്കിലെടുത്ത് നിരവധി പൊലിസുകാര്‍ സ്ഥലത്തെത്തിയിരുന്നു.
 ഉദ്ഘാടനത്തിന് ശേഷം ജില്ലാ പ്രസിഡന്റ് പി മുഹമ്മദ് ഷമ്മാസിന്റെ നേതൃത്വത്തില്‍ ചില പ്രവര്‍ത്തകര്‍ ബാരിക്കേഡ് മറികടന്ന് ഓഫിസിനകത്ത് കയറി. ഇവരെ തടഞ്ഞതോടെ പ്രവര്‍ത്തകരും പൊലിസും തമ്മില്‍ ഉന്തും തള്ളുമായി. കൂടുതല്‍ പേര്‍ ഡി.ഡി.ഇ ഓഫിസിനകത്തേക്ക് കയറാന്‍ ശ്രമിച്ചതോടെ പൊലിസുകാര്‍ തടഞ്ഞു. തുടര്‍ന്ന് പ്രവര്‍ത്തകര്‍ ഓഫിസിന് മുന്നിലിരുന്ന് മുദ്രാവാക്യം വിളിച്ചു.
ഓഫിസിന്റെ ബോര്‍ഡ് തകര്‍ക്കാന്‍ ശ്രമിച്ചതോടെ പൊലിസ് പ്രവര്‍ത്തകരെ പിടിച്ചു മാറ്റി. പൊലിസുമായുണ്ടായ ബലപ്രയോഗത്തിനിടെ കെ.എസ്.യു പ്രവര്‍ത്തകന്‍ അശ്വിന്‍ മതുക്കോത്ത് ബോധരഹിതനായി വീണു. അശ്വിനെയും ജില്ലാ പ്രസിഡന്റുള്‍പ്പടെയുള്ള മറ്റുപ്രവര്‍ത്തകരെയും പൊലിസ് വാഹനത്തില്‍ അറസ്റ്റ് ചെയ്തു നീക്കി.
ഇതിനിടെ പുറത്തുണ്ടായിരുന്ന പ്രവര്‍ത്തകര്‍ പൊലിസിന് നേരെയും കണ്‍ട്രോള്‍ റൂം വാഹനത്തിനു നേരെയും കല്ലെറിഞ്ഞു. ഡി.ഡി.ഇ ഓഫിസിന് മുന്നിലൂടെ പോകുന്ന ബസുള്‍പ്പടെയുള്ള വാഹനങ്ങളും പ്രവര്‍ത്തകര്‍ തടഞ്ഞു.
തുടര്‍ന്ന് നേതാക്കളെത്തി വാഹനങ്ങള്‍ക്ക് കടന്നുപോകാന്‍ സൗകര്യമൊരുക്കുകയായിരുന്നു. ഗതാഗതം തടസപ്പെടുത്തിയതിന് ടൗണ്‍ പൊലിസ് കേസെടുത്തു.
അറസ്റ്റു ചെയ്ത 16 പേരെ പിന്നീട് വിട്ടയച്ചു. മാര്‍ച്ച് ഡി.സി.സി പ്രസിഡന്റ് സതീശന്‍ പാച്ചേനി ഉദ്ഘാടനം ചെയ്തു. പി മുഹമ്മദ് ഷമ്മാസ് അധ്യക്ഷനായി. കെ.എസ്.യു സംസ്ഥാന സെക്രട്ടറി വി.കെ അതുല്‍, റിജില്‍ മാക്കുറ്റി, എം.കെ അരുണ്‍, ടി.സി അഭിജിത്ത്, ഫര്‍സീന്‍ മജീദ്, കെ അശ്വതി, എസ് ഷിബിന്‍ സംസാരിച്ചു.