കണ്ണൂര്‍: ഈ വര്‍ഷത്തെ പ്രവേശനത്തിനുള്ള അപേക്ഷകള്‍ സമര്‍പ്പിക്കാനുള്ള തിയതി ഇന്ന് അവസാനിക്കും. കഴിഞ്ഞ ദിവസം അവസാനിക്കുമെന്ന് അറിയിച്ചിരുന്നെങ്കിലും ഒരുദിവസം കൂടി നീട്ടുകയായിരുന്നു. ട്രയല്‍ അലോട്‌മെന്റ് അഞ്ചിന് നടക്കുമെന്നാണ് വിവരം.
ആദ്യ അലോട്‌മെന്റ് 12ന് നടക്കും. 20നാണ് അലോട്‌മെന്റ് അവസാനിക്കുക. തുടര്‍ന്ന് 21ന് ക്ലാസുകള്‍ക്കും തുടക്കമാകും. 31നാണ് അഡ്മിഷന്‍ അവസാനിക്കുക. സ്‌പോര്‍ട് ക്വാട്ടയില്‍ ആറ് വരെ അപേക്ഷിക്കാം. സ്‌പോര്‍ട്‌സ് ക്വാട്ടയില്‍ 12ന് ഒന്നാംഘട്ട അലോട്‌മെന്റും 19ന് അവസാന അലോട്‌മെന്റും നടക്കും. 25 വരെ സ്‌പോര്‍ട്‌സ് ക്വാട്ടയില്‍ അപേക്ഷ നല്‍കാം. 26ന് സപ്ലിമെന്ററി അലോട്‌മെന്റ് നടക്കും. സ്‌പോര്‍ട്‌സ് ക്വാട്ടയിലുള്ളവര്‍ 27നുള്ളില്‍ പ്രവേശനം നേടണം.
കമ്മ്യൂണിറ്റി ക്വാട്ടയില്‍ നാലിന് ഡാറ്റാ എന്‍ട്രി ആരംഭിക്കും. റാങ്ക് ലിസ്റ്റ് 19ന് പ്രസിദ്ധീകരിക്കും. അന്ന് തന്നെ പ്രവേശനം ആരംഭിക്കും. രണ്ടാംഘട്ട കമ്മ്യൂണിറ്റി ഡാറ്റാ എന്‍ട്രി 28ന് നടക്കും. ജൂലൈ ആറിന് റാങ്ക് ലിസ്റ്റ് പ്രസിദ്ധീകരിക്കും ജൂലൈ 11നാണ് രണ്ടാംഘട്ട കമ്യൂണിറ്റി ക്വാട്ട പ്രവേശനം അവസാനിക്കുക.
മാനേജ്‌മെന്റ്, അണ്‍എയ്ഡഡ് മാനേജ്‌മെന്റ് ക്വാട്ടയില്‍ 12ന് പ്രവേശനം ആരംഭിക്കും. ജൂലൈ എഴിനാണ് പ്രവേശനം അവസാനിക്കുക.
ജില്ലയില്‍ ഇന്നലെ വരെയുള്ള വിവരങ്ങള്‍ അനുസരിച്ച് 34,690 വിദ്യാര്‍ഥികള്‍ ഓണ്‍ലൈനായി അപേക്ഷകള്‍ സമര്‍പ്പിച്ചിട്ടുണ്ട്. 32,969 വിദ്യാര്‍ഥികള്‍ എസ്.എസ്.എല്‍.സി അപേക്ഷകരും 752 സി.ബി.എസ്.സി അപേക്ഷകരും 165 ഐ.സി.എസ്.സി വിദ്യാര്‍ഥികളും അപേക്ഷ നല്‍കിയിട്ടുണ്ട്. സ്‌പോര്‍ട്‌സ് ക്വാട്ടയില്‍ 311 വിദ്യാര്‍ഥികളാണ് അപേക്ഷ നല്‍കിയത്. 804 കമ്മ്യൂണിറ്റി വിഭാഗ അപേക്ഷകളുമാണ് സമര്‍പ്പിച്ചിട്ടുള്ളത്.