കോഴിക്കോട്: തന്റെ നന്മമനസാല്‍ യാഥാര്‍ഥ്യമായ അമല്‍കൃഷ്ണയുടെ വീടിന്റെ താക്കോല്‍ദാനത്തിന് ഇന്ന് ഉമ്മന്‍ചാണ്ടിയെത്തും.
കഴിഞ്ഞ വര്‍ഷം മാര്‍ച്ച് മൂന്നിനാണ് ഉമ്മന്‍ചാണ്ടി ഔദ്യോഗിക ചടങ്ങിനായി നടക്കാവ് ഗവ.ടി.ടി.ഐ വളപ്പിലുള്ള മോഡല്‍ എല്‍.പി സ്‌കൂളില്‍ കെട്ടിടത്തിന്റെ ശിലാസ്ഥാപനത്തിന് എത്തിയപ്പോഴാണ് സ്വന്തമായി വീടില്ലാത്ത അമല്‍കൃഷ്ണയുടെ ദയനീയ അവസ്ഥ സഹപാഠിയില്‍നിന്നു കേട്ടറിഞ്ഞത്.
തുടര്‍ന്ന് അമല്‍കൃഷ്ണയുടെ കുടുംബത്തിന് വീട് വയ്ക്കാന്‍ ഉമ്മന്‍ ചാണ്ടി മുന്നിട്ടിറങ്ങുകയായിരുന്നു. ഇന്ന് രാവിലെ പത്തിന് കക്കുഴിപ്പടിപറമ്പ് കുണ്ടുപറമ്പ് ഗവ.ഹയര്‍ സെക്കന്‍ഡറി സ്‌കൂളിന്റെ കിഴക്കുവശത്ത് നടക്കുന്ന ചടങ്ങില്‍ എ. പ്രദീപ് കുമാര്‍ എം.എല്‍.എ മുഖ്യാതിഥിയായിരിക്കും.
അമല്‍ കൃഷ്ണയുടെ ഭവനനിര്‍മാണം പൂര്‍ത്തിയാക്കാന്‍ പ്രയത്‌നിച്ച പൊതുപ്രവര്‍ത്തകരെയും ഒപ്പം സ്‌കൂള്‍ അധ്യാപകരെയും ആത്മാര്‍ഥമായി അഭിനന്ദിക്കുന്നുവെന്നും അമലിന്റെയും കുടുംബത്തിന്റെയും കൂട്ടുകാരുടെയും സന്തോഷത്തില്‍ പങ്കുചേരാന്‍ ഞാനുമുണ്ടാകുമെന്നും ഉമ്മന്‍ ചാണ്ടി തന്റെ ഫേസ്ബുക്ക് പോസ്റ്റില്‍ പറയുന്നു.