രാജാക്കാട് : ശാന്തമ്പാറയില്‍ ലക്ഷക്കണക്കിന് രൂപയുടെ കുരുമുളക് മോഷ്ടിച്ചു. ഒരേക്കര്‍ തോട്ടത്തിലെ കുരുമുളക് ചെടികള്‍ വ്യാപകമായി നശിപ്പിച്ചുകൊണ്ടാണ് വിളവെടുപ്പിനു പാകമായ ഏകദേശം രണ്ടു ലക്ഷം രൂപയുടെ മുളക് മോഷ്ടാക്കള്‍ പറിച്ചെടുത്തത്.
 ശാന്തമ്പാറ കുറ്റികാട്ടില്‍ റോയിയുടെ തോട്ടത്തില്‍ നിന്നുമാണ് വ്യാപകമായി കുരുമുളക് മോഷ്ട്ടിക്കപ്പെട്ടത്. രാജകുമാരി സ്വദേശി വലിയകുളത്തില്‍ ജോസ് കുര്യന്‍ രണ്ട് ലക്ഷം രൂപക്ക് പാട്ടത്തിനെടുത്തിരുന്ന തോട്ടമാണിത്.
 കഴിഞ്ഞ ദിവസം വിളവെടുപ്പിന് തൊഴിലാളികളുമായി എത്തിയപ്പോഴാണ് മോഷണ വിവരം അറിയുന്നത്. താങ്ങ് മരത്തില്‍ കയറ്റി വിട്ടിരിക്കുന്ന 25  അടിയിലധികം ഉയരമുള്ള കുരുമുളക് ചെടികള്‍ ചുവടെ വെട്ടി വലിച്ചു ചാടിച്ച ശേഷമാണ് മുളക് പറിച്ചെടുത്തിരിക്കുന്നത്. 30 വയസ് പ്രായമുള്ള ഒരേക്കറിലെ മുഴുവന്‍ ചെടികളും നശിപ്പിച്ച അവസ്ഥയിലാണ്. സ്ഥലം ഉടമക്ക് ഉണ്ടായിരിക്കുന്ന നഷ്ട്ടം തിട്ടപെടുത്തുവാന്‍ സാധിക്കാത്ത നിലയിലാണ്.
ഏകദേശം 500 കിലോയോലധികം പച്ചകുരുമുളകാണ് മോഷണം പോയിരിക്കുന്നത്. സമിപതോട്ടത്തിലെ തോഴിലാളികളില്‍ നിന്നും മോഷ്ട്ടാക്കളെ കുറിച്ച് സൂചന ലഭിച്ചതായും ഇവരെ കേന്ദ്രികരിച്ചു അന്വേഷണം നടത്തണമെന്നും ആവശ്യപ്പെട്ട് ശാന്തന്‍പാറ പൊലിസില്‍ പരാതി നല്‍കിയതായി പാട്ടത്തിനെടുത്ത വലിയകുളത്തില്‍ ജോസ് കുര്യന്‍ പറഞ്ഞു. ശാന്തന്‍പാറ പൊലിസ് കേസ് എടുത്ത് അന്വേഷണം ആരംഭിച്ചു.