കൊല്‍ക്കത്ത: പഞ്ചായത്ത് തെരഞ്ഞെടുപ്പിന് പിന്നാലെ മഹേഷ്തല നിയമസഭാ മണ്ഡലത്തില്‍ നടന്ന ഉപതെരഞ്ഞെടുപ്പിലും വന്‍വിജയം നേടി തൃണമൂല്‍ കോണ്‍ഗ്രസ്.
ആകെ പോള്‍ ചെയ്ത വോട്ടിന്റെ 60 ശതാനവും തൃണമൂല്‍ സ്ഥാനാര്‍ഥി ദുലാല്‍ ദാസ് നേടി. ബി.ജെ.പി സ്ഥാനാര്‍ഥി സുജിത്ത് ഗോഷിന് 41,993 വോട്ടുകള്‍ ലഭിച്ചപ്പോള്‍ തൃണമൂല്‍ കോണ്‍ഗ്രസിന് 104,818 വോട്ടുകള്‍ ലഭിച്ചു. മൂന്നാം സ്ഥാനത്തുള്ള ഇടതു സ്ഥാനാര്‍ഥി പ്രഭാത് ചൗധരിക്ക് ലഭിച്ചത് 30,316 വോട്ടുകള്‍ മാത്രമാണ്.
എന്നാല്‍ വോട്ടിങ് നിലവാരത്തില്‍ ബി.ജെ.പിക്ക് വന്‍നേട്ടം. 2016ല്‍ നടന്ന തെരഞ്ഞെടുപ്പില്‍ 7.7 ശതമാനം മാത്രം വോട്ട് ലഭിച്ച ബി.ജെ.പിക്ക് 23.7 ശതമാനം വോട്ടാണ് നിലവില്‍ ലഭിച്ചത്. കോണ്‍ഗ്രസ് പിന്തുണയോടെ മത്സരിച്ച ഇടത് സ്ഥാനാര്‍ഥി വന്‍പരാജയമാണ് നേരിട്ടത്. 2016ല്‍ ഇടതു സ്ഥാനാര്‍ഥിയായിരുന്ന സാമിക് ലാഹിരിക്ക് 42.2 ശതമാനം വോട്ടാണ് ലഭിച്ചതെങ്കില്‍ നിലവില്‍ ഇത് 17.11 ആയി ചുരുങ്ങി.
മുഖ്യമന്ത്രിയുടെ പ്രവര്‍ത്തനങ്ങള്‍ക്കുള്ള ജനങ്ങളുടെ പിന്തുണയാണ് മികച്ച രീതിയില്‍ വോട്ടുകള്‍ നേടിയതിലൂടെ തെളിയുന്നതെന്ന് ദുലാല്‍ ദാസ് പറഞ്ഞു.
സംസ്ഥാനത്ത് കഴിഞ്ഞ വര്‍ഷം മുതല്‍ നടന്ന ഉപതെരഞ്ഞെടുപ്പുകളില്‍ നാലാം തവണയാണ് 50 ശതമാനത്തില്‍ കൂടുതല്‍ വോട്ടുകള്‍ നേടി തൃണുമൂല്‍ വന്‍ വിജയംനേടുന്നത്.