ലണ്ടന്‍: മുന്‍ ഇംഗ്ലണ്ട് ചെല്‍സി താരം ഫ്രാങ്ക് ലംപാര്‍ഡ് ഇനി പരിശീലക വേഷത്തില്‍. ഇംഗ്ലീഷ് ചാംപ്യന്‍ഷിപ്പ് ടീം ഡര്‍ബി കൗണ്ടിയുടെ പരിശീലകനായി ലംപാര്‍ഡ് ചുമതലയേറ്റു. മൂന്ന് വര്‍ഷത്തെ കരാറിലാണ് 39കാരനായ താരം പരിശീലക സ്ഥാനമേറ്റെടുത്തത്. ഗരി റോവെറ്റിന്റെ പകരമാണ് ലംപാര്‍ഡിന്റെ വരവ്. ടീമിനെ പ്രീമിയര്‍ ലീഗിലേക്ക് സ്ഥാനക്കയറ്റം നല്‍കുകയടക്കമുള്ള ഭാരിച്ച വെല്ലുവിളികളാണ് മുന്‍ ചെല്‍സി, മാഞ്ചസ്റ്റര്‍ സിറ്റി മധ്യനിര താരത്തെ കാത്തിരിക്കുന്നത്.
മാര്‍ക്കോ സില്‍വ എവര്‍ട്ടന്‍ കോച്ച്
ലണ്ടന്‍: പോര്‍ച്ചുഗീസ് കോച്ച് മാര്‍ക്കോ സില്‍വ ഇംഗ്ലീഷ് പ്രീമിയര്‍ ലീഗ് ടീം എവര്‍ട്ടന്റെ പുതിയ പരിശീലകന്‍. മൂന്ന് വര്‍ഷത്തെ കരാറിലാണ് 40കാരനായ സില്‍വ ടീമിന്റെ കോച്ചിങ് പദവി ഏറ്റെടുക്കുന്നത്. പുറത്താക്കിയ സാം അല്ലാര്‍ഡൈസിന് പകരമാണ് പോര്‍ച്ചുഗല്‍ കോച്ച് എത്തുന്നത്.
നേരത്തെ വാട്‌ഫോര്‍ഡ്, ഹള്‍ സിറ്റി ടീമുകളെ സില്‍വ പരിശീലിപ്പിച്ചിട്ടുണ്ട്. മോശം പ്രകടനത്തെ തുടര്‍ന്ന് കഴിഞ്ഞ സീസണ്‍ പകുതി പിന്നിട്ടപ്പോഴാണ് അല്ലാര്‍ഡൈസ് സ്ഥാനമേറ്റത്. ടീമിനെ എട്ടാം സ്ഥാനത്ത് ഫിനിഷ് ചെയ്യിപ്പിക്കാന്‍ കോച്ചിന് സാധിച്ചെങ്കിലും അദ്ദേഹത്തിന്റെ പരിശീലന രീതികളെ സംബന്ധിച്ച് വ്യാപക ആരോപണങ്ങള്‍ ഉയര്‍ന്നതിനെ തുടര്‍ന്നാണ് ടീം പുറത്താക്കിയത്.