ന്യൂഡല്‍ഹി: കശ്മീര്‍ താഴ്‌വരയിലെ പ്രശ്‌നങ്ങള്‍ പരിഹരിക്കാന്‍  ചര്‍ച്ച മാത്രമാണ് മാര്‍ഗമെന്ന് കോണ്‍ഗ്രസ് നേതാവ് മണിശങ്കര്‍ അയ്യര്‍. ബുധ്ഗാം ഏറ്റുമുട്ടലിന്റെ പശ്ചാത്തലത്തിലാണ് അദ്ദേഹത്തിന്റെ പ്രതികരണം. ബിജെപി- പിഡിപി സര്‍ക്കാര്‍ കാര്യങ്ങള്‍ മൂടിവെക്കാനാണ് ശ്രമിക്കുന്നതെന്നും അദ്ദേഹം കുറ്റപ്പെടുത്തി.

' ചര്‍ച്ചകളിലൂടെയല്ലാതെ കശ്മീര്‍ പ്രശ്‌നത്തിന് പരിഹാരമാവില്ല. ബിജെപി എല്ലാം മൂടി വെക്കുകയാണ്. ഇത് ശരിയല്ല. താഴ്‌വരയില്‍ സംഘര്‍ഷാവസ്ഥയാണ്. ഇന്ത്യ ഹിന്ദു രാജ്യത്തിലേക്കു നീങ്ങുകയാണെന്നാണ് ഊഹിക്കേണ്ടത്'. മണി ശങ്കര്‍ പറഞ്ഞു.

മതേതര രാഷ്ട്രീയത്തില്‍ നിന്നും ഇന്ത്യ പുറകോട്ട് പോവുന്നതിനനുസരിച്ച് കശ്മീരിലെ സാഹചര്യം വഷളാവുമെന്നും അദ്ദേഹം കൂട്ടിച്ചേര്‍ത്തു.

കശ്മീരിലെ ബിജെപി- പിഡിപി സഖ്യത്തിന് ധാര്‍മികതയില്ല. അത് ഉപയോഗശൂന്യമാണ്. ജനങ്ങള്‍ സര്‍ക്കാറിനെ ഒട്ടും ഇഷ്ടപ്പെടുന്നില്ല. രാജ്യത്തിന്റെ മുന്നോട്ടുള്ള പോക്കില്‍ താന്‍ ആശങ്കാകുലനാണെന്നും അദ്ദേഹം കൂട്ടിച്ചേര്‍ത്തു.

കഴിഞ്ഞ ദിവസം കല്ലേറു നടത്തിയവര്‍ക്കു നേരെ സുരക്ഷാ സേന നടത്തിയ വെടിവെപ്പില്‍ മൂന്നു പേര്‍ കൊല്ലപ്പെട്ടിരുന്നു. 17 പേര്‍ക്ക് പരുക്കേല്‍ക്കുകയും ചെയ്തിരുന്നു.