ന്യൂഡല്‍ഹി: ഇന്ത്യന്‍ ക്രിക്കറ്റ് താരം മഹേന്ദ്ര സിങ് ധോണിയുടെ ആധാര്‍ കാര്‍ഡിലെ വ്യക്തിഗത വിവരങ്ങള്‍ ചോര്‍ന്നു. ഇതേതുടര്‍ന്ന് ഇനിയെന്തെങ്കിലും സ്വകാര്യതയുണ്ടോയെന്ന ചോദ്യവുമായി അദ്ദേഹത്തിന്റെ ഭാര്യ സാക്ഷിരംഗത്ത്.
ആധാര്‍ കാര്‍ഡ് നല്‍കുന്ന സര്‍ക്കാര്‍ ഏജന്‍സിയാണ് അദ്ദേഹത്തിന്റെ വ്യക്തിഗത വിവരങ്ങള്‍ ട്വീറ്റ് ചെയ്തത്. എന്നാല്‍ കേന്ദ്രമന്ത്രി രവി ശങ്കര്‍ പ്രസാദ് ഏജന്‍സിയുടെ ട്വീറ്റ് റീട്വീറ്റും ചെയ്തതോടെ പ്രശ്‌നം കൂടുതല്‍ ചര്‍ച്ചാ വിഷയമായി. ഇതിഹാസ ക്രിക്കറ്ററായ ധോണിയ്ക്ക് ആധാര്‍ കാര്‍ഡ് നല്‍കിയെന്നായിരുന്നു മന്ത്രിയുടെ ട്വീറ്റില്‍ പറഞ്ഞത്. ഇതോടെയാണ് ധോണിയുടെ ഭാര്യ സാക്ഷി ട്വിറ്ററില്‍ പ്രതിഷേധവുമായി എത്തിയത്. സര്‍ക്കാര്‍ ഏജന്‍സിയുടെ ഭാഗത്ത് നിന്നുണ്ടായ ഗുരുതര വീഴ്ച ചൂണ്ടിക്കാട്ടിയ അവര്‍ ഇനിയെന്തെങ്കിലും സ്വകാര്യത അവശേഷിക്കുന്നുണ്ടോ എന്ന് മന്ത്രിയോട് ചോദിച്ചാണ് ട്വിറ്ററില്‍ പ്രതിഷേധിച്ചത്. ശക്തമായി പ്രതികരിച്ചുകൊണ്ട് സാക്ഷി ട്വീറ്റ് ചെയ്ത കുറിപ്പ് ശ്രദ്ധയില്‍പ്പെട്ടതോടെ ഇതിന് വലിയ സ്വീകാര്യത ലഭിക്കുകയും മന്ത്രിയുടെയും ഏജന്‍സിയുടെയും നിലപാടുകള്‍ക്കെതിരേ ഗുരുതര ആരോപണങ്ങളും ഉണ്ടായി. ആധാര്‍ കാര്‍ഡിലെ വ്യക്തിഗത വിവരങ്ങള്‍ പരസ്യമാക്കിയതില്‍ നിരാശയും സാക്ഷി ട്വീറ്റില്‍ പ്രകടമാക്കി.
ഇത് വിവാദമായതോടെ ഏജന്‍സി ട്വീറ്റ് നീക്കം ചെയ്തു. അതേസമയം ധോണിയുടെ ഭാര്യ ചൂണ്ടിക്കാട്ടിയ പിഴവ് മനസിലാകാതെ ആധാര്‍ കാര്‍ഡിലെ വിവരങ്ങള്‍ ചോര്‍ന്നിട്ടില്ലെന്ന് മന്ത്രി വീണ്ടും ട്വിറ്ററില്‍ കുറിച്ചു.