മട്ടാഞ്ചേരി: ഒന്നാം ക്ലാസ് വിദ്യാര്‍ഥിയെ പ്രകൃതി വിരുദ്ധ പീഡനത്തിനിരയാക്കിയ സംഭവത്തില്‍ സ്‌കൂള്‍ ബസ് ഡ്രൈവറെ ഹാര്‍ബര്‍ പൊലിസ് അറസ്റ്റ് ചെയ്തു. ഇടക്കൊച്ചി സലീം കുമാര്‍ റോഡില്‍ കേളമംഗലത്ത് വീട്ടില്‍ കെ.എസ് സുരേഷ്(45)നെയാണ് ഹാര്‍ബര്‍ എസ്.ഐ ജോസഫ് സാജന്റെ നേതൃത്വത്തില്‍ അറസ്റ്റ് ചെയ്തത്.
കൊച്ചിയിലെ ഒരു സ്‌കൂളിലെ ഒന്നാം ക്‌ളാസ് വിദ്യാര്‍ഥിയായ ആറ് വയസുകാരനാണ് പീഡനത്തിനിരയായത്. ഇടപ്പള്ളി സ്വദേശിയായ വിദ്യാര്‍ഥിയെ വീട്ടിലേക്ക് കൊണ്ടുപോകുന്ന വഴിയാണ് ഇയാള്‍ പീഡനത്തിനിരയാക്കിയത്. ഇടപ്പള്ളി ടോള്‍ ബൂത്ത് എത്തുമ്പോഴേക്കും ബസിലുള്ള മറ്റു കുട്ടികളെല്ലാം ഇറങ്ങും. ഇതിന് ശേഷം കുട്ടിയുടെ വീട് വരെയുള്ള ദൂരത്തിനിടയിലായിരുന്നു പീഡനമെന്ന് പൊലിസ് പറഞ്ഞു. കുറച്ച് ദിവസമായി കുട്ടിയുടെ പെരുമാറ്റത്തില്‍ അസ്വാഭാവികത തോന്നിയ പിതാവ് അന്വേഷിച്ചപ്പോഴാണ് പീഡന വിവരം പുറത്തറിഞ്ഞത്. ഇതിനെ തുടര്‍ന്ന് പിതാവ് ഹാര്‍ബര്‍ പൊലിസിന് നല്‍കിയ പരാതിയിലാണ് കേസെടുത്തത്. സ്‌കൂള്‍ ബസില്‍ രണ്ട് ജീവനക്കാരാണുള്ളത്.
ഇതില്‍ ഒരാള്‍ പത്ത് ദിവസം ഡ്രൈവര്‍ ജോലി ചെയ്യുമ്പോള്‍ മറ്റേയാള്‍ ക്‌ളീനറായിട്ടാണ് ജോലി ചെയ്യുക. സുരേഷ് ക്‌ളീനറായി ജോലി ചെയ്ത സമയത്താണ് പീഡനം നടന്നത്. രണ്ട് വര്‍ഷമായി സുരേഷ് ഈ സ്‌കൂള്‍ ബസിലെ ജീവനക്കാരനാണ്.