കണ്ണൂര്‍: കൊട്ടിയൂരില്‍ വൈദികന്‍ പതിനാറുകാരിയെ പീഡിപ്പിച്ച കേസിലെ അവശേഷിക്കുന്ന പ്രതികളും കീഴടങ്ങി. ആറാം പ്രതി സിസ്റ്റര്‍ ലിസ്മരിയ,ഏഴാം പ്രതി സിസ്റ്റര്‍ അനിറ്റ എന്നിവരാണ് ഇന്ന് രാവിലെ പേരാവൂര്‍ സി.ഐ ഓഫിസിലെത്തി കീഴടങ്ങിയത്.
പീഡിപ്പിക്കപ്പെട്ട പെണ്‍കുട്ടിയുടെ കുഞ്ഞിനെ ദത്തെടുക്കല്‍ കേന്ദ്രത്തിലെത്തിക്കാന്‍ ശ്രമിച്ചു എന്നതാണ് ഇവരുടെ പേരിലുള്ള കേസ്. ഇവര്‍ നേരത്തെ ഹൈക്കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിച്ചിരുന്നു. ഇതുപ്രകാരമാണ് ഇവര്‍ ഇന്ന് കീഴടങ്ങാനെത്തിയത്.

അതിനാല്‍ തന്നെ മൊഴി രേഖപ്പെടുത്തി ഇവരെ ഇന്നു തന്നെ ജാമ്യത്തില്‍ വിടും. അന്വേഷണത്തിനു നേതൃത്വം നല്‍കുന്ന പേരാവൂര്‍ സി.ഐ എന്‍. സുനില്‍കുമാറിന്റെ മുമ്പിലാണ് ഇവര്‍ ഇന്ന് ഹാജരായത്. ഇതോടെ കേസിലെ എല്ലാ പ്രതികളും പൊലിസില്‍ കീഴടങ്ങി.