മലപ്പുറം : കൊവിഡ് - 19 ജാഗ്രതയുടെ ഭാഗമായി രാജ്യത്ത്  ലോക്ക്ഡൗണ്‍ പ്രഖ്യാപിച്ച ദിവസങ്ങള്‍ പിന്നിടുമ്പോള്‍ ഫേസ് ബുക്ക് ലൈവിലൂടെ സ്‌നേഹജനങ്ങളോട് സംവദിച്ചു പാണക്കാട് സയ്യിദ് ഹൈദരലി ശിഹാബ് തങ്ങള്‍. ഇന്നലെ രാവിലെ പതിനൊന്നിനാണ് പാണക്കാട്ടെ വസതിയില്‍ നിന്നും സയ്യിദ് മുനവ്വറലി ശിഹാബ് തങ്ങളുടെ ഫേസ്ബുക്ക് പേജിലൂടെ തങ്ങള്‍ സ്വദേശത്തും വിദേശത്തുമുള്ള സ്‌നേഹജനങ്ങളോട് സംവദിച്ചത്.

രാജ്യത്ത് ആരോഗ്യ ജാഗ്രതയുടെ ഭാഗമായി സര്‍ക്കാര്‍ പ്രഖ്യാപിച്ച ലോക്ക്ഡൗണ്‍ നിര്‍ദേശങ്ങള്‍ പൂര്‍ണമായി അനുസരിക്കാനും ലോകത്ത് കൊവിഡ്  രോഗം പടരുന്ന സാഹചര്യത്തില്‍ ആത്മീയമായ മാര്‍ഗനിര്‍ദേശം ഉള്‍കൊണ്ടു മുന്നോട്ടു പോകാനും തങ്ങള്‍ ആഹ്വാനം ചെയ്തു. 

ഒഴിവു വേള ഫലപ്രദമായും ക്രിയാത്മകമായും വിനിയോഗിക്കണം. ആരോഗ്യവകുപ്പിന്റെ നിര്‍ദേശങ്ങള്‍ അനുസരിച്ച് വീട്ടിലിരിക്കേണ്ടത് നമ്മുടെ നാടിനോടും മനുഷ്യരോടുമുള്ള വിശ്വാസിയുടെ കടമയാണ്. അതൊരു പുണ്യകര്‍മമാണെന്നു മനസ്സിലാക്കി എല്ലാവരും വീട്ടില്‍നിന്ന് പുറത്തിറങ്ങാതെ സഹകരിക്കണം. വിപത്തുകള്‍ നമ്മെ ബാധിക്കില്ലെന്ന ചിലരുടെ ധാരണയാണ് വൈറസിന്റെ വ്യാപനത്തിന് കാരണമായത്. അബദ്ധങ്ങള്‍ ആവര്‍ത്തിക്കാതെ ശ്രദ്ധിക്കണം. വീട്ടിലിരുന്ന് പ്രാര്‍ഥിക്കുന്നതാണ് ഇപ്പോള്‍ പുണ്യമുള്ള കാര്യം. പ്രാര്‍ഥനകള്‍ അധികരിപ്പിക്കാനും ആത്മീയ കാര്യങ്ങള്‍ക്ക് കൂടുതല്‍ സമയം കണ്ടെത്താനും ഈ സമയം ഉപയോഗിക്കണം. പ്രവാസികളായ നിരവധി ആളുകള്‍ പലനാടുകളിലും പ്രയാസപ്പെട്ട് കഴിയുന്നുണ്ട്. അവര്‍ ഇപ്പോഴുള്ള രാജ്യത്ത് ഈ മഹാമാരി തടയുന്നതിന് വേണ്ടിയുള്ള നിയമങ്ങളോട് സഹകരിച്ചും പരസ്പരം സഹായിച്ചും ആ രാജ്യത്ത് തന്നെ നില്‍ക്കണം. ലോക സമൂഹത്തിന്റെ മോക്ഷത്തിനും രോഗ ശമനത്തിനും സമാധാനത്തിനും വേണ്ടി പ്രത്യേകം പ്രാര്‍ഥന നടത്തിയാണ് തങ്ങള്‍ അവസാനിപ്പിച്ചത്.