കോഴിക്കോട്: 'നിത്യഹരിത ഭൂമി, വീണ്ടെടുക്കപ്പെട്ട പ്രകൃതി' എന്ന പ്രമേയത്തില്‍ മുസ്‌ലിംലീഗ് നടത്തി വരുന്ന പരിസ്ഥിതി സംരക്ഷണ പ്രവര്‍ത്തനത്തിന്റെ തുടര്‍ച്ചയായി ലോക പരിസ്ഥിതി ദിനത്തോടനുബന്ധിച്ച് കാംപയിന്‍ ജൂണ്‍ 5 മുതല്‍ 12 വരെ നടക്കും. ജൂണ്‍5ന് തൃശൂരില്‍ നടക്കുന്ന സെമിനാറോടുകൂടി കാംപയിനിന്് തുടക്കമാകും. തുടര്‍ന്ന് സംസ്ഥാനത്തെ മുഴുവന്‍ പഞ്ചായത്ത്, മുനിസിപ്പല്‍, ശാഖാതലങ്ങളില്‍ ബോധവല്‍ക്കരണ പരിപാടികള്‍ സംഘടിപ്പിക്കും.
പരിസ്ഥിതി സംരക്ഷണത്തിന് ശക്തമായി ആഹ്വാനം ചെയ്ത പരിശുദ്ധഖുര്‍ആന്‍ അവതീര്‍ണമായ മാസമാണിത്. പരിസ്ഥിതി സംരക്ഷണം ഓരോ വിശ്വാസിയുടെയും കടമയും ബാധ്യതയുമാണ്. മഴക്കാലത്തിന്റെ വരവോടെ പകര്‍ച്ചവ്യാധികളും മാറാരോഗങ്ങളും കടന്നുവരികയാണ്. ഓരോവീടും ഗ്രാമവും രോഗവിമുക്തമാക്കുന്നതിന്കൂടി പരിസ്ഥിതി സംരക്ഷണപ്രവര്‍ത്തനങ്ങളിലൂടെ കഴിയണം.'ബീറ്റ് ദ പ്ലാസ്റ്റിക്' എന്ന പരിസ്ഥിതിദിന സന്ദേശം ഉള്‍ക്കൊണ്ട് പരിസ്ഥിതി സൗഹൃദ ഉല്‍പ്പന്നങ്ങളുടെ ഉപയോഗത്തിനും വ്യാപനത്തിനും കാംപയിന്‍കാലത്ത് ശ്രമിക്കണം. പഞ്ചായത്ത്- നഗരസഭകളെ പ്ലാസ്റ്റിക് മുക്തമാക്കുന്നതിന് മുസ്‌ലിംലീഗ് നേതൃത്വം നല്‍കുന്ന ഭരണസമിതികളും മുസ്‌ലിം യൂത്ത്‌ലീഗ്, എം.എസ്.എഫ് പ്രവര്‍ത്തകരും മുന്നിട്ടിറങ്ങണമെന്നും തങ്ങള്‍ പറഞ്ഞു. കാംപയിന്റെ ഭാഗമായി ജില്ലാ കമ്മിറ്റികള്‍ സംഘടിപ്പിക്കുന്ന പരിപാടികള്‍ സംബന്ധിച്ച് സംസ്ഥാന കമ്മിറ്റി ഓഫിസില്‍ അറിയിക്കണമെന്ന് മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ് , പരിസ്ഥിതി സംരക്ഷണ സമിതി ചെയര്‍മാന്‍ കെ. കുട്ടി അഹമ്മദ്കുട്ടി, കണ്‍വീനര്‍ സലീം കുരുവമ്പലം അറിയിച്ചു.