വരന്തരപ്പിള്ളി: സ്വകാര്യ ബസ് ഡ്രൈവറെ ആക്രമിച്ച് ഗുരുതരമായി പരുക്കേല്‍പ്പിച്ച സംഭവത്തില്‍ പ്രതിയുടെ അറസ്റ്റ് വരന്തരപ്പിള്ളി പൊലിസ് രേഖപ്പെടുത്തി. തൃശൂര്‍ അമല ആശുപത്രിയില്‍ പൊലിസ് നിരീക്ഷണത്തില്‍ ചികിത്സയില്‍ കഴിഞ്ഞിരുന്ന വരന്തരപ്പിള്ളി വടക്കുംമുറി സ്വദേശി അഖില്‍നാഥിന്റെ (23) അറസ്റ്റാണ് രേഖപ്പെടുത്തിയത്.

കോടതിയില്‍ ഹാജരാക്കിയ ഇയാളെ റിമാന്റ് ചെയ്തു. കഴിഞ്ഞ ഞായറാഴ്ച ഉടമയുടെ വീട്ടില്‍ പാര്‍ക്ക് ചെയ്യാനെത്തിയ സ്വകാര്യ ബസ് ഡ്രൈവര്‍ വരന്തരപ്പിള്ളി വടക്കുംമുറി തൈപറമ്പില്‍ വിമല്‍(23)നെയാണ് അക്ഷിനാഥും സുഹൃത്ത് വരന്തരപ്പിള്ളി റോട്ടിപ്പടി സ്വദേശി ശ്രീജിത്തും ചേര്‍ന്നു ആക്രമിച്ചത്. ബസ് യാത്രക്കിടെ ഉണ്ടായ പ്രശ്‌നങ്ങളാണ് ആക്രമണത്തിന് കാരണമായതെന്ന് പൊലിസ് പറഞ്ഞു. ശ്രീജിത്തിനായുള്ള പൊലിസ് അന്വേഷണം തുടരുകയാണ്. പ്രതികളില്‍ അഖില്‍നാഥ് നിലവില്‍ പത്തും, ശ്രീജിത് എട്ടും കേസുകളില്‍ പ്രതിയാണ്.