തൃശൂര്‍ : പ്ലാസ്റ്റിക്കിന്റെ ഉപയോഗം തടയണമെന്നുള്ള ആഹ്വാനത്തോടെയാണു ഈ വര്‍ഷത്തെ ജൂണ്‍ അഞ്ചിന് ലോകപരിസ്ഥിതി ദിനം ആചരിക്കുന്നത്.
ജില്ലാതല ഉദ്ഘാടനം ജൂണ്‍ അഞ്ചിന് രാവിലെ 10.30 ന് ചാലക്കുടി ഈസ്റ്റ് ഗവ. ഗേള്‍സ് ഹൈസ്‌കൂളില്‍ ജില്ലാ പഞ്ചായത്ത് പ്രസിഡന്റ് മേരി തോമസ് നിര്‍വഹിക്കും. ചാലക്കുടി മുനിസിപ്പല്‍ ചെയര്‍പേഴ്‌സണ്‍ ജയന്തി പ്രവീണ്‍ അധ്യക്ഷയാകും .ചാലക്കുടി ബ്ലോക്ക് പഞ്ചായത്ത് പ്രസിഡന്റ് കെ.കെ ഷിജു വൃക്ഷതൈ വിതരണോദ്ഘാടനം നിര്‍വഹിക്കും.
സെന്‍ട്രല്‍ സര്‍ക്കിള്‍ ചീഫ് ഫോറസ്റ്റ് കണ്‍സര്‍വേറ്റര്‍ രാജേഷ് രവീന്ദ്രന്‍ മുഖ്യാതിഥിയാകും.
ചാലക്കുടി ഡി.എഫ്.ഒ ആര്‍. കീര്‍ത്തി പരിസ്ഥിതി പ്രതിജ്ഞ ചൊല്ലും. ചാലക്കുടി വാര്‍ഡ് കൗണ്‍സിലര്‍ വി.ജെ ജോജി, വാഴച്ചാല്‍ ഡി.എഫ്.ഒ എന്‍ രാജേഷ്, ചാലക്കുടി എ.ഇ.ഒ സി.പി പ്രസൂന്നന്‍ , ചാലക്കുടി ഈസ്റ്റ് ഗവണ്‍മെന്റ് ഗേള്‍സ് ഹൈസ്‌കൂള്‍ മേധാവി എം.ഡി ശാലിനി ആശംസ നേരും.
തൃശൂര്‍ അസിസ്റ്റന്റ് ഫോറസ്റ്റ് കണ്‍സര്‍വേറ്റര്‍ എ. ജയമാധവന്‍, ഡെപ്യൂട്ടി റെയിഞ്ച് ഫോറസ്റ്റ് ഓഫിസര്‍ പി.വി സോമരാജന്‍ സംസാരിക്കും. 'തോല്‍പ്പിക്കുക പ്ലാസ്റ്റിക് മലിനീകരണം' എന്നതാണു ഇക്കൊല്ലത്തെ പരിസ്ഥിതി ദിന സന്ദേശം.