മാള: വീട്ടിലേക്കുള്ള വഴി അയല്‍വാസി അടച്ചു കെട്ടിയതോടെ പുറത്തിറങ്ങാനാവാതെ വിധവയും രോഗിയുമായ വൃദ്ധയുടെ കുടുംബം. പൊയ്യ പഞ്ചായത്ത് വാര്‍ഡ് രണ്ട് മാളപള്ളിപ്പുറത്താണ് സംഭവം. മാള പള്ളിപ്പുറം താണിക്കാട് കോളനിയിലെ ചിറയിന്‍മേല്‍ പരേതനായ കോരന്റെ ഭാര്യ കാവലി (75)ക്കാണീ ദുര്യോഗം. അയല്‍വാസി കണിശപ്പിള്ളി പരേതനായ അയ്യപ്പന്റ മക്കളായ രാജു, ഷാജു എന്നിവര്‍ ചേര്‍ന്ന് വഴി അടച്ചതായാണ് പരാതി. പ്‌ളാവില്‍ നിന്നും ചക്ക താഴെ വീണതിനെ ചൊല്ലിയുണ്ടായ തര്‍ക്കമാണ് വഴി അടച്ചു കെട്ടലില്‍ എത്തിയതെന്ന് പരിസരവാസികള്‍ പറയുന്നു.
നൂറ്റാണ്ടായുള്ള വഴി മുന്നറിയിപ്പില്ലാതെ അടച്ചതിനെതുടര്‍ന്ന് വൃദ്ധ പൊലിസില്‍ പരാതി നല്‍കിയിരുന്നു. എന്നാല്‍ പൊലിസ് സ്ഥലത്തെത്തി തിരിച്ചു പോയതല്ലാതെ നടപടികള്‍ ഉണ്ടായില്ലന്ന് വീട്ടുകാര്‍ പറഞ്ഞു. നേരത്തേ ഇവരുടെ വീട്ടിനോടു ചേര്‍ന്ന വീടും പുരയിടവും വ്യക്തിയില്‍ നിന്നും മാളയിലെ ഒരുട്രസ്റ്റ് വില കൊടുത്തു വാങ്ങിയിരുന്നു. ഈ സ്ഥലത്തിലൂടെയും വീട്ടുകാര്‍ വഴിനടന്നിരുന്നു. ഇവിടെ ട്രസ്റ്റ് അധികൃതര്‍ ചുറ്റുവേലി കെട്ടിഗേറ്റ് സ്ഥാപിച്ചതോടെ ഈ വഴിയും ഇല്ലാതായി. എന്നാല്‍ വൃദ്ധയുടെ ദുരവസ്ഥ തിരിച്ചറിഞ്ഞ ട്രസ്റ്റ് ഭാരവാഹികള്‍ ഗേറ്റ് തുറന്ന് നല്‍കാന്‍ സന്മനസ്സ് കാട്ടിയിട്ടുണ്ട്. അതേ സമയം ട്രസ്റ്റ് അധികൃതര്‍ വഴി നല്‍കണമെന്നാവശ്യവും ഉയര്‍ന്നിട്ടുണ്ട്.
ഇരുഭാഗത്ത് കൂടേയും പുറം ലോകത്തേക്ക് എത്തുന്നതിന് നേരത്തേ ഉണ്ടായിരുന്ന വഴി തുറന്നു നല്‍കണമെന്ന് നാട്ടുകാര്‍ ആവശ്യപ്പെട്ടു. താണിക്കാട് പൂപ്പത്തി റോഡില്‍ നിന്നും 12 വീടുകളിലേക്കുള്ള വഴിയാണിത്. എന്നാല്‍ 2015ല്‍ എട്ടോളം വീട്ടുകാര്‍ക്ക് മറ്റൊരു വഴി പഞ്ചായത്ത് ടാറിംങ് നടത്തി ഗതാഗത യോഗ്യമാക്കി. അതേ സമയം ഉയര്‍ന്ന പ്രദേശത്തുള്ള നാല് വീട്ടുകാര്‍ക്ക് പഴയ വഴി തന്നെ ആശ്രയിക്കേണ്ടി വന്നിരിക്കുകയാണ്. നടന്നു പോകാന്‍ മാത്രം കഴിയുന്ന വഴിയിലൂടെ നാല് വീട്ടുകാര്‍ക്കും മൃതദേഹം കൊണ്ടുപോകാന്‍ പോലുമാവില്ല. നിരന്തരം ആവശ്യപെട്ടിട്ടും പഞ്ചായത്ത് നടപടി എടുത്തിട്ടില്ല.