കൊച്ചി: സംസ്ഥാനത്തെ തദ്ദേശസ്വയംഭരണ സ്ഥാപനങ്ങളിലെ ശുചീകരണ വിഭാഗം തൊഴിലാളികള്‍ ജോലി ചെയ്യുന്നത് ആവശ്യത്തിന് സുരക്ഷാ ഉപകരണങ്ങളില്ലാതെ. കൊവിഡ്-19 രോഗവ്യാപനം തടയുന്നതില്‍ ഏറ്റവും പ്രധാനപ്പെട്ട ദൗത്യം നിര്‍വഹിക്കുന്ന തൊഴിലാളികള്‍ക്ക് ആരോഗ്യസുരക്ഷയ്ക്ക് സര്‍ക്കാരും തദ്ദേശസ്ഥാപനങ്ങളും വേണ്ടത്ര ശ്രദ്ധ കൊടുക്കുന്നില്ലെന്ന പരാതി വ്യാപകമാണ്. 

നഗരസഭകളിലും പഞ്ചായത്തുകളിലും കൊവിഡിന്റെ പശ്ചാത്തലത്തില്‍ ശുചീകരണ ജോലികള്‍ ഊര്‍ജ്ജിതമാക്കിയിട്ടും ജീവനക്കാരുടെ കാര്യത്തില്‍ വേണ്ടത്ര ശ്രദ്ധ ചെലുത്താത്തത് രോഗവ്യാപന ഭീഷണിയും ഉയര്‍ത്തുന്നുണ്ട്.

സാധാരണയായി മാലിന്യങ്ങള്‍ ശേഖരിക്കുന്ന ജീവനക്കാര്‍ക്ക് കൈയുറകളും കാലുറകളും നല്‍കാറുണ്ട്. കൊറോണ വൈറസ് വ്യാപകമാകുന്ന സാഹചര്യത്തില്‍ മാസ്‌കും ലഭ്യമാക്കേണ്ടതുണ്ടെങ്കിലും മിക്കവാറും തദ്ദേശസ്ഥാപനങ്ങളിലും ഇവ ലഭ്യമാക്കിയിട്ടില്ലെന്നാണ് പരാതി.തദ്ദേശസ്വയംഭരണ സ്ഥാപനങ്ങള്‍ക്ക് ഇതിനാവശ്യമായ നിര്‍ദേശം നല്‍കാനും സുരക്ഷാ ഉപകരണങ്ങള്‍ ലഭ്യമാക്കാനും തദ്ദേശസ്വയംഭരണ വകുപ്പ് കാര്യമായ നടപടികളൊന്നും സ്വീകരിച്ചിട്ടില്ല. 

സാധാരണഗതിയില്‍ തന്നെ വിവിധ സാംക്രമിക രോഗങ്ങള്‍ വരാന്‍ സാധ്യതയുള്ളവരാണ് ശുചീകരണ തൊഴിലാളികള്‍. 

ഇവരില്‍ ശ്വാസകോശ സംബന്ധമായ രോഗങ്ങളും ത്വക്ക് രോഗങ്ങളും വ്യാപകമായി കണ്ടു വരുന്നതായി പഠനങ്ങളുമുണ്ട്. ചില തദ്ദേശസ്ഥാപനങ്ങളില്‍ ഓഫിസുകളിലേക്ക് കയറുമ്പോഴും ഇറങ്ങുമ്പോഴും മാത്രമാണ് ശുചീകരണ തൊഴിലാളികള്‍ക്കായി ഹാന്‍ഡ് സാനിറ്റൈസര്‍ നല്‍കുന്നത്.