കൊച്ചി: പ്രശസ്ത മാധ്യമപ്രവര്‍ത്തകയും ജന്മഭൂമി എഡിറ്ററുമായ ലീലാ മേനോന്‍ (86) അന്തരിച്ചു. കൊച്ചിയിലെ സിഗ്‌നേച്ചര്‍ ഓള്‍ഡ് ഏജ് ഹോമില്‍ ഇന്നലെ രാത്രി 8.30 ഓടെയായിരുന്നു അന്ത്യം. ഏറെനാളായി രോഗബാധിതയായി ചികിത്സയിലായിരുന്നു.
എറണാകുളം ജില്ലയിലെ പെരുമ്പാവൂരിനു സമീപം വെങ്ങോലയില്‍ തുമ്മാരുകുടി ജാനകിയമ്മയുടേയും പാലക്കോട്ട് നീലകണ്ഠന്‍ കര്‍ത്താവിന്റെയും ഇളയ മകളായി 1932 നവംബര്‍ 10 നാണ് ജനനം. 1949ല്‍ പോസ്റ്റ് ഓഫിസ് ക്ലാര്‍ക്കായി ഔദ്യോഗിക ജീവിതം തുടങ്ങി.
1978ല്‍ ഇന്ത്യന്‍ എക്‌സ്പ്രസില്‍ ജോലിയില്‍ പ്രവേശിച്ചു. പിന്നീട് ഇംഗ്ലീഷ്, മലയാളം പ്രസിദ്ധീകരണങ്ങളില്‍ കോളമിസ്റ്റായിരുന്നു. പരേതനായ മുണ്ടിയാത്ത് വീട്ടില്‍ മേജര്‍ ഭാസ്‌ക്കര മേനോനാണ് ഭര്‍ത്താവ്. ഇന്ന് രാവിലെ 10 മുതല്‍ 12 വരെ എറണാകുളം ടൗണ്‍ ഹാളില്‍ പൊതുദര്‍ശനത്തിനു വയ്ക്കുന്ന മൃതദേഹം ഉച്ചയ്ക്ക് ഒന്നിന് രവിപുരം ശ്മശാനത്തില്‍ സംസ്‌കരിക്കും.