ക്വാലാലംപൂര്‍: വനിതാ ഏഷ്യാ കപ്പ് ടി20 ക്രിക്കറ്റ് പോരാട്ടത്തിലെ ആദ്യ മത്സരത്തില്‍ ഇന്ത്യക്ക് കൂറ്റന്‍ ജയം. ഇന്ത്യന്‍ വനിതകള്‍ മലേഷ്യന്‍ വനിതാ ടീമിനെ 142 റണ്‍സിന് തകര്‍ത്തു. ആദ്യം ബാറ്റ് ചെയ്ത ഇന്ത്യ നിശ്ചിത 20 ഓവറില്‍ മൂന്ന് വിക്കറ്റ് നഷ്ടത്തില്‍ 169 റണ്‍സ് അടിച്ചെടുത്തപ്പോള്‍ മലേഷ്യയുടെ പോരാട്ടം 13.4 ഓവറില്‍ വെറും 27 റണ്‍സിന് അവസാനിപ്പിച്ചാണ് ഇന്ത്യ ഉജ്ജ്വല വിജയം സ്വന്തമാക്കിയത്.
ആറ് താരങ്ങള്‍ സംപൂജ്യരായി മടങ്ങിയപ്പോള്‍ ഒന്‍പത് റണ്‍സെടുത്ത സഷ അസ്മിയാണ് മലേഷ്യയുടെ ടോപ് സ്‌കോററായത്. മൂന്നോവറില്‍ ആറ് റണ്‍സ് മാത്രം വഴങ്ങി പൂജ വസ്ട്രകര്‍ മാരകമായി പന്തെറിഞ്ഞു. രണ്ടോവറില്‍ ഒരു റണ്‍സ് പോലും വിട്ടുകൊടുക്കാതെ പൂനം യാദവ് രണ്ട് വിക്കറ്റെടുത്തു. അനുജ പാട്ടീലും രണ്ട് വിക്കറ്റുകള്‍ വീഴ്ത്തി.
ടോസ് നേടി ആദ്യം ബാറ്റ് ചെയ്ത ഇന്ത്യക്കായി വെറ്ററന്‍ താരം മിതാലി രാജ് പുറത്താകാതെ 97 റണ്‍സെടുത്തു.
69 പന്തില്‍ 13 ഫോറും ഒരു സിക്‌സും സഹിതമാണ് മിതാലിയുടെ മികച്ച ബാറ്റിങ്. ക്യാപ്റ്റന്‍ ഹര്‍മന്‍പ്രീത് കൗര്‍ 23 പന്തില്‍ 32 റണ്‍സ് എടുത്ത് മിതാലിക്ക് പിന്തുണ നല്‍കി.
ഇന്ത്യയെ കൂടാതെ പാകിസ്താന്‍, ശ്രീലങ്ക, ബംഗ്ലാദേശ്, തായ്‌ലന്‍ഡ്, മലേഷ്യ ടീമുകളാണ് ഏഷ്യന്‍ പോരില്‍ മാറ്റുരയ്ക്കുന്നത്. ഇന്ന് നടക്കുന്ന രണ്ടാം പോരില്‍ ഇന്ത്യ തായ്‌ലന്‍ഡുമായി ഏറ്റുമുട്ടും.