ദോഹ: കൊവിഡ് വൈറസ് ബാധയുടെ പശ്ചാത്തലത്തില്‍ മാറ്റിവെച്ച ഖത്തര്‍ ഉള്‍പ്പെടെയുള്ള വിദേശ രാജ്യങ്ങളിലെ സി.ബി.എസ്.ഇ പരീക്ഷകള്‍ ഉപേക്ഷിക്കുന്നു. പത്ത്, 12 ക്ലാസുകളില്‍ ഇനി നടക്കാനുളള പരീക്ഷകള്‍ നടത്താതെ തന്നെ ഫലം പ്രഖ്യാപിക്കും.

പത്താം ക്ലാസ് വിദ്യാര്‍ഥികള്‍ക്ക് സോഷ്യല്‍ സ്റ്റഡീസ് പരീക്ഷ മാത്രമാണ് ബാക്കിയുളളത്. 12ാം ക്ലാസിന് വിദ്യാര്‍ഥികള്‍ തെരഞ്ഞെടുത്ത വിഷയം അനുസരിച്ച് രണ്ടും മൂന്നും ഓപ്ഷനുകളിലുളള പരീക്ഷകളാണ് നടക്കാനുളളത്. ഖത്തറിലെ മുഴുവന്‍ ഇന്ത്യന്‍ സ്‌കൂളുകളും സി.ബി.എസ്.ഇ സിലബസാണ് പിന്തുടരുന്നത്.

സി.ബി.എസ്.ഇ ഇന്നലെ പുറപ്പെടുവിച്ച സര്‍ക്കുലറിലാണ് വിദേശ രാജ്യങ്ങളിലെ പരീക്ഷകള്‍ ഉപേക്ഷിക്കുന്നതായി അറിയിച്ചത്. 25 വിദേശരാജ്യങ്ങളിലാണ് സി.ബി.എസ്.ഇ സ്‌കൂളുകള്‍ ഉള്ളത്. ഇതില്‍ പല രാജ്യങ്ങളിലും വിവിധ കാലയളവിലേക്ക് ലോക്ക്ഡൗണ്‍ നടപ്പാക്കുകയോ സ്‌കൂള്‍ പൂട്ടിയിടുകയോ ചെയ്തിട്ടുണ്ട്.

ഓരോ രാജ്യത്തിനും വ്യത്യസ്ത സമയത്ത് പരീക്ഷ നടത്തുക പ്രായോഗികമല്ല. പരീക്ഷ നടന്നാലും മൂല്യ നിര്‍ണയത്തിന് അവിടെ നിന്ന് ഇന്ത്യയിലേക്ക് നിലവിലെ സാഹചര്യത്തില്‍ ഉത്തരക്കടലാസുകള്‍ എത്തിക്കാന്‍ സാധിക്കില്ല. അതുകൊണ്ട് 10, 12 ക്ലാസുകളിലേക്ക് ബാക്കിയുള്ള പരീക്ഷകള്‍ ഉപേക്ഷിക്കുകയാണെന്ന് സി.ബി.എസ്.ഇ സര്‍ക്കുലറില്‍ പറയുന്നു. 

ഫലം പ്രഖ്യാപിക്കുന്നതിന് ഏത് രീതിയില്‍ മാര്‍ക്കുകള്‍ നല്‍കുമെന്ന കാര്യത്തില്‍ ബോര്‍ഡ് തീരുമാനമെടുത്ത് സ്‌കൂളുകളെ അറിയിക്കും.