ന്യൂഡല്‍ഹി: കൊവിഡ് വൈറസ് ബാധ സംബന്ധിച്ച് ജനങ്ങള്‍ക്കിടയില്‍ പരിഭ്രാന്തിയുണ്ടാക്കുന്ന വ്യാജ വാര്‍ത്തകള്‍ തടയാന്‍ ഫലപ്രദമായ നടപടികള്‍ സ്വീകരിക്കണമെന്നാവശ്യപ്പെട്ട് കേന്ദ്ര ആഭ്യന്തര മന്ത്രാലയം സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും കത്തയച്ചു. വാര്‍ത്തകളുടെ നിജസ്ഥിതി സാധാരണക്കാര്‍ക്ക് പരിശോധിക്കാന്‍ കേന്ദ്രസര്‍ക്കാര്‍ വെബ്‌സൈറ്റ് തയാറാക്കും. സമാനമായ സംവിധാനം സംസ്ഥാനങ്ങള്‍ക്കും കേന്ദ്രഭരണ പ്രദേശങ്ങള്‍ക്കും ഒരുക്കാമെന്ന് കേന്ദ്ര ആഭ്യന്തരമന്ത്രാലയം സെക്രട്ടറി അജയ്കുമാര്‍ ഭല്ല കത്തില്‍ നിര്‍ദേശിച്ചു.

കുടിയേറ്റത്തൊഴിലാളികള്‍ പലായനം ചെയ്യുന്നതുമായി ബന്ധപ്പെട്ട കേസ് പരിഗണിക്കവെ വ്യാജവാര്‍ത്തകള്‍ തടയുന്നതിന് നടപടി സ്വീകരിക്കാന്‍ കേന്ദ്ര സര്‍ക്കാരിന് സുപ്രിം കോടതി നിര്‍ദേശം നല്‍കിയിരുന്നു. ഇതിന്റെ അടിസ്ഥാനത്തിലാണ് കേന്ദ്രസര്‍ക്കാര്‍ കത്തെഴുതിയിരിക്കുന്നത്. വ്യാജവാര്‍ത്തകള്‍ പ്രചരിച്ചതു കൊണ്ടാണ് ഡല്‍ഹിയുള്‍പ്പടെയുള്ള നഗരങ്ങളില്‍ നിന്ന് കുടിയേറ്റത്തൊഴിലാളികള്‍ കൂട്ടത്തോടെ പലായനം ചെയ്തതെന്നാണ് കേന്ദ്രസര്‍ക്കാര്‍ വാദിക്കുന്നത്. കോടതി നിര്‍ദേശത്തെത്തുടര്‍ന്ന് കുടിയേറ്റ തൊഴിലാളികള്‍ക്ക് ആഹാരം, വൈദ്യ സഹായം തുടങ്ങിയ അടിസ്ഥാന സൗകര്യങ്ങള്‍ ഉറപ്പാക്കാനാവശ്യപ്പെട്ടുകൊണ്ടുള്ള മാര്‍ഗനിര്‍ദേശങ്ങളും കേന്ദ്രസര്‍ക്കാര്‍ പുറപ്പെടുവിച്ചിട്ടുണ്ട്.