റിയാദ്: സഊദിയിൽ മദ്യപാനത്തിനിടെ മലയാളികൾ തമ്മിലുണ്ടായ തർക്കത്തിനിടെ ഒരാൾ കുത്തേറ്റു മരിച്ചു. കിഴക്കൻ പ്രവിശ്യാ നഗരിയായ ദമാമിനടുത്ത് അൽഖോബാർ റാക്കയിലാണ് സംഭവം. വിഴിഞ്ഞം സ്വദേശി സന്തോഷ് പീറ്ററാ(32)ണ് കൊല്ലപ്പെട്ടത്. സ്വകാര്യ കോൺട്രാക്ടിങ് കമ്പനിയിലെ ജോലിക്കാരനായ ഇദ്ദേഹം ഇന്നലെ വൈകിട്ട് ഏഴിന് ജോലി കഴിഞ്ഞതിനു ശേഷം താമസ സ്ഥലത്തു എത്തി സുഹൃത്തുക്കളുമായി ചേർന്നുള്ള മദ്യപാനത്തിടെ വാക്കേറ്റമുണ്ടാകുകയായിരുന്നു.

    ഇതിനിടെ വാക്കേറ്റത്തിൽ കൊല്ലം സ്വദേശി സക്കീർ കത്തിയെടുത്തു കുത്തുകയായിരുന്നു. സംഭവത്തിൽ സന്തോഷ് തൽക്ഷണം മരിച്ചു. കൂടെയുണ്ടായിരുന്ന മലയാളിയായ ജിജോക്കും പരിക്കേറ്റിട്ടുണ്ട്. ഇദ്ദേഹത്തെ അടുത്തുള്ള ആശുപത്രിയിൽ എത്തിച്ചതോടെ അപകടനില തരണം ചെയ്‌തിട്ടുണ്ട്‌. അൽ കോബാർ പോലീസ് കേസ് എടുത്തു. പ്രതിക്കായി പോലീസ് തിരച്ചിൽ ആരംഭിച്ചിട്ടുണ്ട്.