ചെറുവത്തൂര്‍: വടക്കന്‍ കേരളത്തില്‍ പൂരോത്സവവുമായി ബന്ധപ്പെട്ടു നടക്കുന്ന പത്മശാലിയപൊറാട്ടിന് പിലിക്കോട് തുടക്കം. പിലിക്കോട് രയരമംഗലം ഭഗവതി ക്ഷേത്രം കാര്‍ത്തിക വിളക്ക് മഹോത്സവ ഭാഗമായാണ് ആചാരപ്പെരുമയില്‍ ആക്ഷേപ ഹാസ്യവുമായി പൊറാട്ട് വേഷങ്ങള്‍ അരങ്ങിലെത്തിയത്.
പിലിക്കോട് തെരുവിലെ വിവിധ വീടുകളില്‍ നിന്നായാണ് പൊറാട്ട് വേഷങ്ങള്‍ അണിഞ്ഞൊരുങ്ങിയത്. തുടര്‍ന്നു ചെണ്ടയില്‍ വലംതാളം അടിച്ച് കൈവിളക്കും പിടിച്ചു വാല്യക്കാര്‍ അരയാല്‍ തറയില്‍ എത്തി കൊട്ടിയറിയിപ്പു നടത്തിയതോടു കൂടിയാണ് തെരുവില്‍ പൊറാട്ട് വേഷങ്ങള്‍ പ്രത്യക്ഷപ്പെട്ടത്. ഇന്നു രാവിലെ എട്ടിന് നടക്കുന്ന എഴുന്നള്ളത്തിനൊപ്പം മതില്‍ക്കെട്ടിനകത്തും പൊറാട്ട് വേഷങ്ങള്‍ എത്തും.