തിരുവനന്തപുരം: എസ്.എസ്.എല്‍.സി കണക്കു പരീക്ഷയുടെ ചോദ്യം ചോര്‍ന്നത് വിജിലന്‍സ് അന്വേഷിക്കും. ചോദ്യപേപ്പര്‍ ചോര്‍ന്നതു സംബന്ധിച്ച് അന്വേഷിച്ച പൊതുവിദ്യാഭ്യാസ സെക്രട്ടറിയുടെ റിപ്പോര്‍ട്ടിനെ തുടര്‍ന്നാണ് തീരുമാനം.

ചോദ്യപേപ്പര്‍ ചോര്‍ന്ന സംഭവത്തില്‍ പൊലിസ് അന്വേഷണം വേണമെന്ന് വിദ്യാഭ്യാസവകുപ്പ് ആവശ്യപ്പെട്ടിരുന്നു. ഗുരുതരമായ ക്രമക്കേട് നടന്നിട്ടുണ്ടെന്നും ഇതില്‍ വകുപ്പുതല അന്വേഷണം കൊണ്ട് മാത്രം കാര്യമില്ലെന്നുമാണ് വിദ്യാഭ്യാസ വകുപ്പിന്റെ നിലപാട്.

ചോദ്യകര്‍ത്താക്കള്‍ക്ക് സ്വകാര്യ സ്ഥാപനങ്ങളുമായി ബന്ധമുണ്ടെന്ന് വകുപ്പുതല അന്വേഷണത്തില്‍ വ്യക്തമായിരുന്നു. ഇതിന്റെ അടിസ്ഥാനത്തില്‍ ചോദ്യപേപ്പര്‍ തയാറാക്കിയ അധ്യാപകനെ സസ്‌പെന്‍ഡ് ചെയ്യുകയും കണക്ക് പരീക്ഷാ ബോര്‍ഡ് അധ്യക്ഷനെ ചുമതലകളില്‍നിന്ന് ആജീവനാന്തം വിലക്കുകയും ചെയ്തിരുന്നു.

സ്വകാര്യ ഏജന്‍സി നടത്തിയ മാതൃകാ പരീക്ഷയിലെ ചോദ്യങ്ങള്‍ അതേപടി ചോദ്യപേപ്പറില്‍ കടന്നുകൂടിയെന്നായിരുന്നു പരാതി. ചോദ്യപേപ്പറിലെ 13 ചോദ്യങ്ങള്‍ മാതൃകാ ചോദ്യപേപ്പറുമായി സാമ്യമുണ്ടെന്നു കണ്ടെത്തിയിരുന്നു.