ഏറ്റുമാനൂര്‍: കൊല്ലപ്പെട്ട കെവിന്‍ ജോസഫിന്റെ ഭാര്യ നീനുവിനെ മാനസിക രോഗ ചികിത്സയ്ക്കായി കെവിന്റെ വീട്ടില്‍ നിന്ന് മാറ്റണമെന്ന് ആവശ്യപ്പെട്ട് നീനുവിന്റെ പിതാവ് ചാക്കോ കോടതിയെ സമീപിച്ചു. നീനുവിനും അമ്മ രഹനയ്ക്കും മാനസിക രോഗമുണ്ടെന്നും ചികിത്സക്ക് തിരുവനന്തപുരത്തെ പ്രമുഖ ആശുപത്രിയില്‍ കൊണ്ടുപോയിരുന്നുവെന്നും ഹരജിയില്‍ പറയുന്നു.
ചികിത്സാകാര്യം കസ്റ്റഡി അപേക്ഷയിലെ വാദത്തിനിടെ ഉന്നയിച്ചിരുന്നെങ്കിലും അപ്രസക്തമെന്ന് ചൂണ്ടിക്കാട്ടി കോടതി അത് നേരത്തെ പരിഗണിച്ചിരുന്നില്ല. മറ്റൊരപേക്ഷ നല്‍കാന്‍ നിര്‍ദേശിച്ചതിനെ തുടര്‍ന്നാണ് ചികിത്സക്കായി നീനുവിനെ കെവിന്റെ വീട്ടില്‍ നിന്ന് മാറ്റണമെന്ന് ആവശ്യപ്പെട്ട് ചാക്കോ കോടതിയെ സമീപിച്ചത്. ചാക്കോയുടെ അപേക്ഷ ഫയലില്‍ സ്വീകരിച്ച കോടതി അടുത്ത ആഴ്ച പരിഗണിക്കാനായി മാറ്റി.
അതിനിടെ, കേസിലെ മുഖ്യപ്രതി സാനു, പിതാവ് ചാക്കോ എന്നിവരടക്കം ആദ്യ ആറ് പ്രതികളെ നാല് ദിവസത്തേക്ക് വീണ്ടും പൊലിസ് കസ്റ്റഡിയില്‍ വിട്ടു. സാനുവിനേയും ചാക്കോയേയും കൂട്ടി തെളിവെടുപ്പ് നടത്തണം, മൊബൈല്‍ കണ്ടെത്തണം, പ്രതികളെ ഒന്നിച്ചിരുത്തി ചോദ്യം ചെയ്യണം എന്നിങ്ങനെ പൊലിസ് മുന്നോട്ട് വച്ച ആവശ്യങ്ങള്‍ പരിഗണിച്ചാണ് വീണ്ടും കസ്റ്റഡിയില്‍ നല്‍കിയത്.
കെവിന്‍ കേസില്‍ ഗാന്ധി നഗര്‍ സ്റ്റേഷനിലെ മുന്‍ എസ്.ഐ ഉള്‍പ്പടെ നാല് പൊലിസുകാര്‍ക്കെതിരേയുള്ള നടപടി തുടങ്ങിയിട്ടുണ്ട്. പൊലിസുകാരുടെ ഭാഗത്തുനിന്നുള്ള വീഴ്ച പരിശോധിക്കുന്ന അഡ്മിനിസ്‌ട്രേറ്റീവ് ഡിവൈ.എസ്.പി ഇവര്‍ക്ക് നോട്ടിസ് നല്‍കും. 15 ദിവസത്തിനകം മറുപടി നല്‍കണമെന്നാണ് ആവശ്യം. പിരിച്ചുവിടല്‍ ഉള്‍പ്പടെയുള്ള നടപടികളാണ് ആലോചിക്കുന്നത്.
മുഖ്യപ്രതി സാനുവില്‍ നിന്നും കൈക്കൂലി വാങ്ങിയെന്ന കേസില്‍ ഏറ്റുമാനൂര്‍ കോടതി ജാമ്യം അനുവദിച്ച എ.എസ്.ഐ ബിജു, ഡ്രൈവര്‍ അജയകുമാര്‍ എന്നിവരുടെ ജാമ്യം റദ്ദാക്കണമെന്നാവശ്യപ്പെട്ട് അന്വേഷണ സംഘം ഹൈക്കോടതിയെ സമീപിക്കും. കൈക്കൂലി കേസ് അന്വേഷിക്കുന്ന ചങ്ങനാശേരി ഡിവൈ.എസ്.പിയാണ് കോടതിയെ സമീപിക്കുക.